Azərbaycan,Bakı/müxbir Trend İ.Xəlilova /Azərbaycan Milli Bankı (AMB) bankın nəzdində fəaliyyət göstərən Mərkəzləşdirilmiş Kredit Reyestrinin (MKR) gələcək təkmilləşdirilməsi predmeti üzrə beynəlxalq təşkilatlarla danışıqlara başlayıb. Bu barədə AMB-dən məlumat verilib.
Azərbaycanın maliyyə sahəsinin müasirləşdirilməsi üzrə Dünya Bankının yeni layihəsinin hazırlanması çərçivəsində AMB artıq kredit reyestrinin inkişafının ikinci fazasının bu layihəyə daxil edilməsi ideyası ilə müraciət edib. "Dünya Bankının ekspertləri təklifi maraqla qarşılayıb və ilkin mərhələdə razılıq verib. Lakin maliyyələşmənin dövlət strategiyası çərçivəsində həyata keçirilməsini nəzərə alaraq bu məsələni ilk öncə hökumətlə müzakirə etmək lazımdır", deyə AMB-dən bildirilib.
Milli Bank ABŞ-ın Beynəlxalq İnkişaf Agentliyi (USAID) ilə əməkdaşlıq çərçivəsində bu istiqaməti də daxil etməyi təklif edib. Agentlik artıq diaqnostik xülasə və kredit reyestrinin gələcək inkişaf yollarını müəyyən etmək üçün məsləhətçinin səfərini maliyyələşdirib. Onun hazırladığı məsləhətlər artıq müzakirə olunub və Milli Bank gələcək əməkdaşlığa ümid bəsləyir.
MKR 2005-ci ilin martında Dünya Bankının "Azərbaycanın maliyyə sahəsinə texniki yardım" layihəsi çərçivəsində yaradılıb. Kredit reyestri bankların kredit risklərinin idarə edilməsi alətlərindən biridir.
