Azərbaycan, Bakı /müx. Trend İ.Xəlilova / "Azərdəmiryolbank" və Avropa Yenidənqurma və İnkişaf Bankı (AYİB) konkret layihələr seçildikdən sonra AYİB-in birgə maliyyələşdirmə proqramına qoşulması ilə bağlı saziş imzalayacaqlar. Bu barədə bankın İdarə Heyətinin sədri Roman Əmircanov məlumat verib.
Bu proqram paritet əsaslarda risq və maraqların bölgüsü ilə iri layihələrin kreditləşməsini nəzərdə tutur. Sazişin ümumi dəyərinin 6 milyon dollar olacağı gözlənilir. Əmircanovun sözlərinə görə, hazırda bankda müzakirədə olan layihələr məhz bu həcmdədir. "Belə layihələr ciddi yanaşma tələb edir. Buna görə də onların seçimi ilə tələsməyəcəyik" - deyə bank rəhbəri vurğulayıb.
Hazırda AYİB-dən alınan resursların ümumi həcmi 12,5 milyon dollara bərabərdir. Bu məbləğin 9,5 milyonu mikro, kiçik və orta müəssisələrin dəstəklənməsinə, 3 milyonu isə revolver kredit müqaviləsi çərçivəsində ayrılıb.
