Azərbaycan,Bakı/müxbir Trend İ.Xəlilova/2009-cu il ərzində bütün ərazi vergi orqanlarında vergi ödəyicilərinə xidmət göstərilməsi üçün terminallar quraşdırılacaq. Bu barədə cümə axşamı vergilər naziri Fazil Məmmədov nazirliyin ikinci ərazi vergi idarəsində terminalın açılışında məlumat verib.
İlk terminal vergi ödəyicilərinə bu gün istifadəyə verilib. Vergi terminalları məlumat, vergi deklorasiyalarının yerinə yetirilməsi ilə bağlı xidmətlərin göstərilməsi, vergi qanunvericiliyi üzrə məlumat və izahatların əldə olunması üçün nəzərdə tutulub.
Terminal vasitəsilə vergi ödəyiciləri şəxsi vərəqələrinə baxmaq, kompüter vasitəsilə məktub, ərizə və müraciət göndərmək, vergi ödəmələrinin qəbulunun təşkili və s. kimi imkanlar qazanacaqlar.
Nazirin sözlərinə görə, vergi terminallarının tətbiqi yeni texnologiyalar vasitəsilə vergi ödəyicilərinə xidmət sisteminin təkmilləşdirilməsində yeni mərhələyə keçidlə xarakterizə olunur.
