Azərbaycan, Bakı /müx. Trend İ.Xəlilova / Avropa Yenidənqurma və İnkişaf Bankının (AYİB) Direktorlar Şurası yeni emissiya çərçivəsində Unibank-ın kapitalının artması ilə əlaqədər onun səhmlərinə yazılmaq üçün icazə verib. Bu barədə AYİB şurasının qərarında deyilir. AYİB hesab edir ki, bankın kapitallaşması onun ölkənin bank bazarındakı aparıcı mövqeyini qoruyub saxlamağa imkan verəcək.
Qeyd edək ki, UniBank-ın səhmdarları ümumi kapitalın 40 mln. manatadək çatdırılmasına dair qərar verib. Bu qərarın icrasından sonra, yəni 2007-ci ilin sonunadək bankın kapitalı 2,5 dəfə artacaq. Bunun üçün UniBank-ın 8,4 mln. manatlıq səhmlərinin növbəti emissiyası planlaşdırılır. Emissiyanın yerləşdirilməsindən sonra nizamnamə kapitalının həcmi 15 mln. manata çatacaq.
Xatırladaq ki, bankın nizamnamə kapitalı 2006-ci il ərzində dəyişməyib və 6,6 mln. manat səviyyəsində qalıb. Lakin müvafiq göstəricinin 12,655 mln. manata bərabər olduğu halda ümumi kapital 1,36 dəfə artıb.
Ölkənin aparıcı banklarından olan UniBank 2002-ci ildə MBank və Promtexbank-ın birləşməsi nəticəsində yaranıb. AYİB-in bankın kapitalındakı iştirak payı 15 faiz təşkil edir.