Azərbaycan, Gəncə / Trend müxbir V.Məmmədov/ Almaniya hökumətinin əsas məqsədi Azərbaycanın regionlarında, o cümlədən Gəncədə kənd təsərrüfatı və turizm sahəsini inkişaf etdirməkdir. Bu barədə Almaniyanın ölkəmizdəki səfiri Per Stankina çərşənbə günü Gəncədə keçirilən Almaniya-Azərbaycan Biznes Forumunda məlumat verib.
Səfirin sözlərinə görə, Azərbaycan məktəblərində alman dilinin tədrisinin genişləndirilməsi istiqamətində də layihələr həyata keçiriləcək.
Stankina bildirib ki, Almaniya iş adamları Gəncədə sənaye və kino sahələrinin inkişafında maraqlıdır.
"Gəncə şəhərində çox böyük kinoteatr var və bura 14 ildən artıqdır ki, fəaliyyət göstərmir. Biz bu istiqamətdə Azərbaycan hökumətinə layihələr təklif edəcəyik" - deyə səfir vurğulayıb.
Almaniya-Azərbaycan Biznes Forumunda 16 alman iş adamı iştirak edib.
Gəncə paytaxt Bakıdan 360 kilometr qərbdə yerləşir.
