Azərbaycan, Bakı /müx. Trend S.Əliyev/ Dörd ay ərzində Azərbaycan Dövlət Dəmir Yolu (ADDY) Rusiyadan daha dörd elektrovoz (elektrik enerjisi ilə işləyən lokomotiv) alacaq. Bu barədə çərşənbə günü ADDY-nin baş mühəndisi Qurban Nazirov məlumat verib.
Bu il Azərbaycan artıq Rusiyadan iki lokomotiv alıb. Ötən il isə ADDY 220 min dollara dörd elektrovoz gətizdirib. Hazırda onların qiyməti bir qədər artıb. Bu lokomotivlər ADDY-nin daxili imkanları hesabına alınır.
Ötən il ADDY həmçinin Rusiyadan büdcə vəsaitləri çərçivəsində beş yeni lokomotiv alıb. Bu məqsədlə 10 mln. manat xərclənib.
Hazırda ADDY-nin istifadəsində 113 elektrovoz var. Bunlardan 92-si yük daşımalarında, 21-i isə sərnişin daşımalarında istismar olunur. ADDY qarşısına öz dövrünü başa vurmuş lokomotiv parkını yeniləşdirmək məqsədi qoyub. Bu işin xarici vəsaitlər, konkret olaraq Avropa Yenidənqurma və İnkişaf Bankının krediti hesabına görülməsi planlaşdırılır.
