Azərbaycan, Bakı /müx. Trend İ.Xəlilova / Dövlət Komitəsindən çərşənbə axşamı verilən məlumata görə, Azərbaycanın Dövlət Əmlakının idarə Edilməsi üzrə Dövlət Komitəsi "Sumqayıt superfosfat" QSC-nin səhmlərinin 99,83% -ni investisiya müsabiqəsinə çıxarıb. Müsabiqə təkliflərinin qiymətləndirilməsi 20 iyulda baş tutacaq, namizədlər özəlləşdirmə planı ilə iyulun 17-nə qədər tanış ola və iştirak üçün ərizələr təqdim edə bilərlər.
Təkliflər paketində həmçinin müasir standartlara uyğun məhsul istehsal etmək və ixracyönümlü məhsulların istehsalı üçün yeni texnologiyanın tətbiqi məqsədilə tədbirlərin görülməsini nəzərdə tutan investisiya proqramı olmalıdır.
Təklifdə dövlət büdcəsindən 1,5 mln. dolların ayrılması və Dövlət Komitəsinə ödəmə məqsədilə 100 min özəlləşdirmə çekinin verilməsi öz əksini tapmalıdır.
"Sumqayıt superfosfat" müəssisəsinin nizamnamə kapitalı 1 iyun 2007-ci il üçün7,545 mln. manat təşkil edir. Müəssisə istismara 1956-cı ildə verilib, işçilərinin sayı 540-dır. QSC-nin öhdəliyi 1,241 mln. manat təşkil edir ki, əmlak, xidmət və iş üzrə borclar bu məbləğin 1,223 mln. manatını, məvaciblər isə 0,179 mln. manatını təşkil edir. Müəssisənin debitor borcu 1,847 mln. manat təşkil edir.