Azərbaycan, Bakı/ Trend müxbir İ.Xəlilova/ "Bank Respublika"nın səhmdarlar yığıncağı 2007-ci ilin sonunda Beynəlxalq Maliyyə Korporasiyasının (BMK) bankın səhmdarları sırasına daxil olması məsələsinə baxacaq. Bu barədə bankın Risk-menecmenti Departamentinin direktoru Aqşin Əmirov məlumat verib.
"Mən hesab etmirəm ki bu məsələnin baxılması ləngiyir. Sadəcə bu cür strateji qərarlar səhmdarların ümumi yığıncağında qəbul olunur" - deyə Əmirov bildirib.
BMK "Bank Respublika"nın səhmlərinin 10 faizini almağa maraq göstərir. Hələ BMK-nın bankın səhmdarları sırasına daxil olmasının fəaliyyət göstərən səhmdarların payını almaq, yaxud yeni emissiyanın elan olunması hesabına baş verəcəyi qərara alınmayıb.
BMK Direktorlar Şurası "Bank Respublika"nın kapitalına 4,5 mln. dollar vəsait qoyulması barədə qərar qəbul edib. Bununla yanaşı, korporasiya əsas borcun ödənilməsində iki il möhlət olmaqla 5 il müddətinə 1,5 mln. dollarlıq kredit xətti ayırıb. Kredit xətti Azərbaycanda kiçik və orta sahibkarlığın inkişafı üçün nəzərdə tutulub.
"Bank Respublika"nın kapitalında artıq xarici iştirak payı var. Hazırda 25 faiz və bankın 1 səhmi "Sparkassen International Development Trust" (SIDT, Sparkassen-Finanzgruppe üzvü) və "Deutsche Entwicklungsgesellschaft"a (DEG, KfW banking group üzvü) məxsusdur.
