Azərbaycan, Bakı /müx. Trend S.Babayeva/ Azərbaycanda "quş qripi" ilə bağlı növbəti monitorinqlər oktyabrın sonunda-noyabrın əvvəlində, yəni köçəri quşların miqrasiya dövründə bərpa olunacaq. Bu barədə çərşənbə axşamı Azərbaycan Kənd Təsərrüfatı Nazirliyi yanında Dövlət Baytarlıq Xidmətinin mətbuat katibi Yolçu Xanvəli məlumat verib .
Monitorinq xüsusi komissiya tərəfindən keçirilir. Bu komissiyaya Baytarlıq Xidməti, Ekologiya, Səhiyyə nazirliklərinin və Azərbaycanın Ovçular Cəmiyyətinin mütəxəssisləri daxildir. Adəti üzrə monitorinq Abşeron yarımadasını, Dəvəçi, Salyan, Ağcabədi və Lənkəranı əhatə edir.
Xanvəlinin sözlərinə görə, hazırda ölkədə "quş qripi" ilə əlaqədər vəziyyət sabitdir. Lakin vəhşi quşların miqrasiyası dövründə təhlükə yaranır. Bu il dövlət xidməti 8 monitorinq keçirib, vəhşi və ev quşlarından analiz üçün götürülmüş 8210 nümunə araşdırılıb. Virus aşkarlanmayıb.
Xanvəli onu da deyib ki, Azərbaycanda vəhşi quşların ovu, əti və satışına qoyulan qadağa hələ qüvvədədir. Ölkənin bütün sərhəd-keçid baytarlıq məntəqələri "quş qripi" və Ffrika taunu, dabaq kimi xəstəliklərin yayılmasının qarşısını almaq üçün gücləndirilmiş rejimdə işləyir.