Sənaye və energetika naziri Xəzər hövzəsindən boru kəmərlərinin çəkilməsində ziddiyyətin olmadığını bəyan edib
Azərbaycan, Bakı/ Trend müxbir A.Bədəlova/ Xəzər hövzəsindən keçən boru kəmərlərinin çəkilməsində heç bir ziddiyyət yoxdur. Bunu cümə günü Azərbaycanın sənaye və energetika naziri Natiq Əliyev , Xəzərsahili dövlət başçılarının İranda keçirilən görüşünü şərh edərkən, söyləyib.
Nazir bildirib ki, Xəzərsahili dövlətlərin Tehran sammiti yüksək səviyyədə keçib.
"Sammitdə biz, Xəzərsahili dövlətlərin mövqelərinin necə olmasına bir daha əmin olmaq imkanı əldə etdik, həmçinin, anladıq ki, bir sıra məsələlərdə bizim fikirlərimiz yaxındır",-deyə nazir söyləyib.
Oktyabrın 16-da Tehranda Xəzər dənizinin statusu məsələsi üzrə beş Xəzərsahili dövlətin - İran, Azərbaycan, Qazaxıstan, Rusiya və Türkmənistanın-- sammiti keçirilib. Sammitin yekununda Xəzərsahili dövlətlərin Xəzər dənizinin statusu ilə bağlı ilk rəsmi sənədi olan Bəyannamə imzalanıb.
