Azərbaycan, Bakı, 09 fevral / Trend , müxbir S.Babayeva/ 2008-ci ilin yanvarında "Azneftkimyamash" ASC neft maşın qayırma avadanlıqlarının istehsalını 16,2 faiz artırıb. Bu barədə şənbə günü ASC-nin baş iqtisadçısı Nəriman Böyükkişi məlumat verib.
"Artım istehsalın gücləndirilməsi hesabına mümkün olub" - deyə o bildirib.
Onun sözlərinə görə, ay ərzində 2,5 mln. manatlıq neft-mədən, geoloji-axtarış avadanlığı, alətlər və onların hissələri istehsal olunub.
Bu dövr ərzində ən məhsuldar müəssisə 427 min manatlıq avadanlıq istehsal edən Suraxanı maşınqayırma zavodu olub. "Bakı fəhləsi" zavodu 312 min manatlıq, Sabunçu EİB 222,5 min manat, Bakı neft-maşınqayırma zavodu 240,3 min manat, Zabrat maşınqayırma zavodu 309 min manat, Səttarxan zavodu 207,3 min manat, Sərdarov zavodu 247 min manatlıq avadanlıq istehsal edib.
Bu dövr ərzində daxili və xarici bazarlarda reallaşdırılan məhsulların dəyəri 2 mln. manat təşkil edib. Satış 2007-ci ilin yanvarına nisbətdə 33 faiz artıb.
2008-ci ildə ASC 33,5 mln. manatlıq istehsal proqnozlaşdırır.
"Azneftkimyamash" respublika prezidentinin 2001-ci il 22 mart tarixli sərəncamına əsasən "Azneftkimyamash" DŞ-nın bazasında yaradılıb. ASC-nin tərkibinə 14 maşınqayıram zavodu, 4 elmi-tədqiqat və layihə-konstruksiya institutları daxildir.
