Azərbaycan, Bakı, 11 aprel/ Trend , müxbir A.Bədəlova/ Rusiya prezidenti federal mülkiyyətdə olan 78 neft-qaz sənayesi şirkətinin "Rosnefteqaz" dövlət şirkətinə birləşməsi haqqında fərman imzalayıb. "Kommersant"-ın yazdığına görə, fərman "Qazprom"-un birbaşa dövlət nəzarətinə keçməsi yolunda birinci addımdır.
Rusiya analitikləri hesab edirlər ki, dövlət nəzarəti "Qazprom"-un bazar fəaliyyətinə təsir etməyəcək.
Rusiyanın "Antanta Kapital" analitik investisiya şirkətinin analitiki Timur Xayrulinin rəyinə görə, dövlətin "Qazprom" üzərinə birbaşa nəzarət almaq niyyəti şirkətin gələcək fəaliyyətinə təsir etməyəcək.
"Bu ,çox ehtimal ki, əvvəllərdə dövlətin maraqlarına uyğun fəaliyyət göstərən "Qazprom"-un fəaliyyəti və mövqeyində öz əksini tapmayacaq texniki qərardır", - analitik cümə günü Trend -a bildirib.
Xayrulin "Rosnefteqaz" vasitəsilə əvvəllərdə "Qazprom" üzrərində nəzarətin faktiki olaraq qismən dövlətə məxsus olduğunu bildirib.
Hazırda dövlət "Qazprom"-da 49,112 faiz səhm payına malikdir, "Qazprom"-un səhmlərinin 0,89 faizi "Rosqazifikasiya" ASC-nin mülkiyyətindədir. ASC-də dövlətin payı 74,54 faiz təşkil edir.
Xayrulinin rəyinə görə, şirkətin Direktorlar Şurasında dövlət məmurlarının ağalığı əvvəlki kimi qalacaq.
"YuniKredit Aton" şirkətinin analitiki Pavel Sorokin bildirib ki, "Qazprom" üzərində dövlət nəzarətinin artırılmasına ehtiyac yoxdur.
"Dövlət belə də "Qazprom" üzərində nəzarətə malikdir və onun artırılmasına ehtiyac yoxdur", - o bildirib.
Sorokinin rəyinə görə, "Qazprom" üzərində dövlət nəzarəti hansısa qiymətlərin formalaşdırılmasına heç bir halda təsir etməyəcək. Onun sözlərinə görə, qazın bazar qiymətlərinə keçid siyasətini həyata keçirməyə davam edəcək.
Müəlliflə əlaqə saxlamaq üçün elektron ünvan: [email protected]