Azərbaycan, Bakı, 06 iyun/ Trend / Yanvar-mayda Azərbaycanda 4,4 mlrd. kubmetr qaz təhvil verilib. Bunun təqribən 2,8 mlrd. kubmetri Azərbaycan Dövlət Neft Şirkətinin (ARDNŞ) payına düşüb. ARDNŞ qazı şəxsi vəsaitləri hesabına işlədiyi yataqlardan hasil edib. Bu barədə ARDNŞ-nin cümə günü yayılan məlumatında deyilir.
ARDNŞ-nin məlumatında deyilir ki, yanvar-mayda qalan 1,6 mlrd. kubmetr qaz Azərbaycan Beynəlxalq Əməliyyat Şirkətinin (ABƏŞ) neftlə birlikdə "Azəri-Çıraq-Günəşli" yatağından hasil etdiyi səmt qazının və "Şahdəniz" müqavilə sahəsinin payına düşüb.
Mayda dövlətə 896,3 mln. kubometr qaz təhvil verilib. Bunun 576,5 mln. kubometri ARDNŞ-nin, qalan 319,8 mln. kubmetri isə, ABƏŞ və "Şahdəniz" layihəsinin payına düşüb.
1994-cü ildə imzalanmış PSA tipli müqaviləyə əsasən, ABƏŞ saziş üzrə neft-qaz əməliyyatlarının aparılması üçün konsorsiuma lazım olan həcmlər istisna olmaqla, "Azəri-Çıraq-Günəşli" yatağından neftlə birlikdə çıxarılan səmt qazını əvəzsiz olaraq Azərbaycana verir.
