Azərbaycan, Bakı, 07 iyun/ Trend / Yanvar-may aylarında "Azərenerji" Səhmdar Cəmiyyətinə yanacaq qismində 1,9 mlrd. kub metr qaz verilib. Bu barədə ARNDŞ-ın məlumatında bildirilir.
Yanvar-mayda verilən qazın ümumi həcmindən 983 mln. mln. kub metr Azərbaycan Dövlət Neft Şirkətinin, 346 mln. kub metr "Azəri-Çıraq-Günəşli" yatağından hasil edilən səmt qazının və təqribən 586 mln. kub metr "Şahdəniz" qazının payına düşür.
Proqnoza əsasən, "Azərenerji" 2008-ci ildə 5,557 mlrd. kub metr qaz alacaq. Bunun 3,448 mlrd. kub metri ARNDŞ, 750 mln. kubmetr "AÇG", 1,359 mlrd. kub metri isə "Şahdəniz"in payına düşəcək.
Ötən ilin aprelindən etibarən Azərbaycanda dövlət idarələri arasında qaz əməliyyatları üzrə qarşılıqlı hesablamalar sxemi dəyişdirilib. Azərbaycan Dövlət Neft Şirkəti şəxsi qazını birbaşa olaraq "Azərenerji" SC-yə satır. Əvvəllər ARDNŞ bu əməliyyatı "Azəriqaz" vasitəsilə həyata keçirirdi.
Dövlət Neft Şirkəti qazı hər min kub metrinə görə 42 manata "Azəriqaz" Səhmdar Cəmiyyətinə satırdı. O isə öz növbəsində elektrik enerjisinin istehsalı üçün "Azərenerji"yə lazım olan yanacağı realizə edirdi.
"Azərenerji"nin "Azəriqaz"a tədarük etdiyi yanacağa görə ödəmələri az olub və öz növbəsində "Azəriqaz"ın ARDNŞ qarşısında borcu yaranıb. Hazırda "Azəriqaz" qazı yalnız elektrik stansiyalarına nəql edir.
