Azərbaycan, Bakı, 11 iyun/ Trend , müxbir E.İsmayılov/ Azərbaycan Dövlət Neft Şirkətinin "Kompleks qazma işləri" tresti üç ay ərzində "Cəfərli" quru yatağında yeni dərin istismar quyusunun qazılmasını başa çatdıracaq. Bu barədə çərşənbə günü trestdən məlumat veriblər.
Hazırda quyuda sütunun 3875 m dərinliyə endirilməsi həyata keçirilir. Bu işlər başa çatdıqdan sonra, təqribən daha180 m qazmaq planlaşdırılır. "Kompleks qazma işləri" trestindən bildiriblər ki, quyunun layihə dərinliyi 4050 m təşkil edir.
Hazırda "Cəfərli" yatağında yeni ikinci istismar quyusunun dərinliyi 3131 təşkil edir. Onun layihə dərinliyi isə 4050 metrdir. Trestdən onu da bildiriblər ki, bu quyuda qazma işlərini 3 ay ərzində başa çatdırmaq planlaşdırılır.
Yeni quyularda güman edilən sutkalıq hasilat həcmi hər birindən təqribən 60-70 ton təşkil edəcək.
Müəlliflə əlaqə saxlamaq üçün elektron ünvan: [email protected]
