Azərbaycan, Bakı, 15 dekabr/ Trend , müxbir N.İsmayılova/ 2008 - ci ilin yanvar -sentyabrı ərzində Azərbaycandan 25,1 mlrd. dollar həcmində neft məhsulları ixrac edilib ki, bu da ölkənin ümumi ixracatının 95,6 faizini təşkil edir,- Milli Bankın açıqladığı ödəmə balansında bildirilir. Hesabatda neft məhsullarının üstün mövqelərini saxladığı göstərilir. 2007-ci ilin analoji dövrü ilə müqayisədə neft məhsullarının ixracı 1,9 dəfə artıb.
İxrac edilmiş neft məhsullarının ümumi həcmindən 1,7 mlrd. dollar neft emalı məhsulları, 23,4 mlrd. dollar isə xam neftin payına düşür. Bununla yanaşı, 22,6 mlrd. dollar ABƏŞ-in hasil etdiyi xam neftin payına düşür. Bunun 13,2 mlrd. dolları Azərbaycanın payına düşən mənfəət nefti, 9,4 mlrd. dolları isə iri neft şirkətlərinin ölkədə neft-qaz layihələrinə yatırdıqları birbaşa sərmayələrin hesabına repatriasiya etdikləri xammaldır. SOCAR şirkəti (Azərbaycanın Dövlət Neft Şirkəti) və digər müəssisələr ölkədən xaricə 0,8 mlrd. dollar məbləğdə xam neft çıxarıblar.
Qeyri - neft sektorunun payına düşən ixrac mallarının ümumi dəyəri 38,1 faiz artaraq 1 mlrd. 111 mln. dollara çatıb. Bu artım qara və əlvan metalların, kimya məhsullarının məhsullarının ixracı hesabına təmin edilib.
Ümuilikdə yanvar-sentyabrda ixrac 1,8 dəfə - 26,2 mlrd. dollaradək artıb.
Müəlliflə əlaqə saxlamaq üçün elektron ünvan: [email protected]
