Azərbaycan, Bakı, 09 yanvar/ Trend / 2008 - ci ildə Mingəçevir SES kaskadı (Mingəçevir SES və Varvara SES) 1 mlrd. kVt/saatdan çox elektrik enerjisi istehsal edib ki, bu da proqnozlaşdırılandan 78 mln. kVt/saat çoxdur, - "Azərenerji" SC-nin məlumatında deyilir.
Kaskadın 2008 - ci ildə istehsal etdiyi enerjinin təxminən 940 mln. kVt/saatı Mingəçevir SES, qalan 78 mln. kVt/saatı Varvara SES - in payına düşüb.
Bir müddət əvvəl "Azərenerji" SC layihələndirmə, eləcə də Mingəçevir SES kaskadının yenidən qurulması üçün zəruri olan avadanlığın istehsalı, təchizatı, qurulması, sınaqdan keçirilməsi və istismara verilməsinə tender elan edib. Bu işlər İslam İnkişaf Bankının (İİB) ayırdığı kredit hesabına həyata keçirilir.
Layihə Mingəçevir SES üçün iki 70 meqavatlıq hidroaqreqat və 110, 220, 330 kilovatlıq yarımstansiyaların yenidən qurulması, yeni idarəetmə mərkəzinin tikintisi, avadanlığın quraşdırılması, Varvara SES üçün üç ədəd beşmeqavatlıq hidroaqreqatın və 35 kilovatlıq yarımstansiyanın yenidən qurulması, hidrotexniki qurğularda təmir - bərpa işləri və nəzarət - uçot sisteminin yaradılması, hər iki elektrik stansiyasında rabitə sisteminin yenidən qurulmasını nəzərdə tutur.
Bu layihənin (II mərhələ) realizəsinin dəyəri 105 mln. dollara bərabərdir. Vəsaitin 80 mln. dolları İİB - in ayırdığı kredit, qalan 25 mln. dolları Azərbaycan hökumətinin payına düşür. İİB - in krediti, üç il güzəştli dövr olmaqla, 15 ilə və illik 5,95 faiz dərəcə ilə təqdim edilib. Vəsaitlər lizinq mexanizmi üzrə veriləcək.
Mingəçevir SES - də I mərhələ çərçivəsində işlər hələ 90 - cı illərin sonunda aparılıb. İİB və AYİB - in maliyyələşdirilməsi ilə generatorlar, yarımstansiyalar dəyişdirilib, yerüstü idarəetmə pultu quraşdırılıb. Ümumilikdə bu işlərə 40 mln. dollara yaxın vəsait sərf olunub. Bu vəsaitin 12,5 mln. dolları İslam Bankı, 21 mln. dolları Avropa Bankı tərəfindən ayrılmışdı.
Yanvarın 9 - na olan cari mübadilə məzənnəsi -- 0,8017 AZN/USD.
