Azərbaycan, Bakı, 21 yanvar/ Trend , müxbir E.İsmayılov/ 2009-cu ildə Gürcüstanın Batumi limanı neft terminalından 2008-ci ildəki 2,1 mln. tona qarşı 2,5 mln. ton Azərbaycan neftini aşırmağı planlaşdırır, - Batumi neft terminalının Baş direktoru Temirxan Abdirov Trend -a bildirib.
"2009-cu ildə Batumi neft terminalı 2008-ci ildəki 2,4 mln. tona qarşı 2,8 mln. ton Qazaxıstan neftini aşıracaq. Terminaldan "Tengiz" yatağından hasil edilmiş 1,5-2,5 mln. ton həcmində qazax neftini aşırmaq planlaşdırılır", - Abdirov deyib.
Amerikanın ChevronTexaco şirkəti 2008-ci ilin oktyabrında Qazaxıstanın "Tengiz" yatağından hasil edilən neftin Azərbaycan ərazisi ilə nəqlinə başlayıb. Sazişin şərtlərinə əsasən, neft Bakı-Tbilisi-Ceyhan boru kəməri və dəmir yolu ilə Gürcüstanın limanlarınadək (Batumi və Kulevi) nəql ediləcək.
Abdirovun bildirdiyinə görə, 2009-cu ildə Batumi limanından 2008-ci ildəki 0,4 mln. tona qarşı 0,2 mln. ton həcmində türkmən neftini aşırmaq planlaşdırılır.
2008-ci ildə Batumi neft terminalı 7,2 mln. ton həcmində maye yükün aşırılmasını həyata keçirib və cari ildə də analoji göstərici gözlənilir. Terminalın orta sutkalıq aşırma gücü 600 min ton təşkil edir, - Abdirov qeyd edib.
"Batumi neft terminalının zəmanət verilmiş gücü ildə 15 mln. ton təşkil edir. Terminal rəhbərliyi 2009-cu ildə ötürmə gücünün artırılması üzrə işlər aparmağı planlaşdırmır. Terminalda təhlükəsizlik səviyyəsinin yüksəldilməsi və regionda ekoloji vəziyyətin yaxşılaşdırılması üzrə işlər həyata keçirmək də planlaşdırılır", - Abdirov bildirib.
Limanda beş terminal fəaliyyət göstərir. Neft terminalı (1,2,3-cü körpülər, eləcə də eyni zamanda 4 tanker qəbul etmək vəziyyətində olan "körpüsüz doldurma"), çoxməqsədli konteyner terminalı (4-cü körpü), dəmir yolu dəniz bərəsi üçün körpü (5-ci körpü), yük terminalı (6,7,8 və 9-cu körpülər), sərnişin terminalı (10 və 11-ci körpülər). Neft terminalının maksimal illik ötürmə gücü 15 mln. ton, yük terminalının - 2,3 mln. ton, bərə keçidinin - 700 min ton təşkil edir.
Müəlliflə əlaqə saxlamaq üçün elektron ünvan: [email protected]