Azərbaycan, Bakı, 23 yanvar/ Trend /
SOCAR şirkəti (Azərbaycanın Dövlət Neft Şirkəti) "Günəşli" yatağında quraşdırılmış ən böyük platformalarından birində hasilatı xeyli artırmaq niyyətindədir. Şirkətin hasil etdiyi neft və qazın əsas həcmi bu yatağın payına düşür, - SOCAR-ın məlumatında bildirilir.
Şirkət 2004-cü ilin mayında yataqda quraşdırılmış "Günəşli-13" platformasında doqquz yeni quyu qazmaq niyyətindədir. Hazırda 20 quyunun qazılmasına hesablanmış quyudan sutkada 2,3 mln. kubmetr təbii qaz, 213 min kubmetr səmt qazı, 660 ton neft və 250 ton kondensat hasil olunur.
Platformada qazma işlərini Dövlət Neft Şirkətinə məxsus SOCAR-AQS birgə müəssisəsi həyata keçirir. Bu şirkət eyni zamanda iki buruğun qazılmasını aparır. Ötən dörd il ərzində platformada cəmi 11 yeni quyu qazılıb.
"Günəşli" SOCAR-ın müstəqil işlədiyi ən böyük neft-qaz yatağıdır. SOCAR-ın hasil etdiyi bütün neft və qaz həcminin müvafiq olaraq 60 və 70 faizi bu yatağın payına düşür.
Yeni quyuların qazılması SOCAR-ın təsdiqlədiyi 2008-2010-cu illərdə "Günəşli" dəniz neft-qaz yatağının dayazsulu hissəsini işləyəcək "28 may" NQÇİ-nin inkişaf proqramı çərçivəsində həyata keçirilir. Proqram çərçivəsində neft hasilatının sabitləşdirilməsi və təbii qaz hasilatı həcminin artırılması planlaşdırılıb.
