Qazaxıstan, Astana, 27 fevral / Trend , müxbir K.Arınova / Qırğızıstan Qazaxıstanın Mərkəzi Asiya Birləşmiş Enerji Sistemindən (BES) müstəqil rejimə keçidini başa düşdüyünü bildirib. Bu haqda cümə günü keçirilən brifinqdə KEGOC SC-nin vitse-prezidenti Valeri Li bildirib.
"Biz Qırğızıstanla danışıqlar apardıq. Qırğız həmkarlarımız başa düşdülər ki, istifadəçilərimizin korluq çəkməsinə yol verə bilməzdik", - Li deyib.
Dünən Qazaxıstanın vahid enerji sistemi Mərkəzi Asiyanın enerji sistemindən müstəqil fəaliyyətə keçib. Səbəb kimi Tacikistanın normadan artıq enerjidən istifadəsi göstərilib.
KEGOC vitse-prezidentinin sözlərinə əsasən , Tacikistanının plandankənar enerji istifadəsinin həcmi 26 fevrala qədər 100 mln. kVt/saat təşkil edib.
Qırğız KİV-lərinin verdiyi məlumata görə, Astananın məlum addımından sonra Qırğızıstan ölkənin şimalında enerji verilməsində fasilələr etməyə məcbur olub.
"Qırğızıstanda anlayırlar ki, bu müvəqqəti tədbirdir və 15 aprelədək sürəcək", - Li qeyd edib.
Vitse-prezident oxşar vəziyyətin 2001-ci ildə də yarandığını qeyd edib.
"Son on il ərzində Qazaxıstan iknci dəfədir ki, Mərkəzi Asiya BES-dən çıxır", - Li vurğulayıb.
Məqalə müəllifi ilə əlaqə ünvanı: [email protected]
