Azərbaycan, Bakı, 16 mart / Trend /
Dövlət Statistika Komitəsindən verilən məlumta əsasən, yanvar-fevral aylarında Bakı-Tbilisi-Ceyhan (BTC) boru kəməri vasitəsi ilə 301,3 min ton Qazaxıstanın "Tengiz" yatağından əldə olunan neft nəql edilib. Yanvar ayı ərzində BTC vasitəsi ilə 161,1 min ton Tengiz nefti nəql edilib.
2008-ci ilin oktyabr-dekabr aylarında BTC ilə 285,1 min ton Qazaxıstan nefti daşınıb.
Tengiz neftinin BTC vasitəsi ilə nəqlinə ötən ilin oktyabrında ABŞ-ın ChevronTexaco şirkəti başlayıb. Razılaşmaya əsasən, Tengiz nefti Bakı-Tbilisi-Ceyhan vasitəsi ilə və dəmiryolu vasitəsi ilə Gürcüstanın Kulevi ilə Poti limanlarına qədər daşınacaq. Nəql olunan neftin həcminin il ərzində 4 mln. tona qədər artırılması gözlənilir.
ChevronTexaco Qazaxıstanın "Tengiz" yatağının operatorudur. Müqavilənin əhatə etdiyi sahənin işləmləri ilə "TengizŞevroyl" şirkəti məşğul olur.
BTC səhmdarları - BP (30,1%); AzBTC (25%); Chevron (8,90%); StatoilHydro (8,71%); TRAO (6,53%); Eni (5%); Total (5%); Itochu (3,40%); Inpex (2,50%); ConocoPhillips (2,50%) və Hess (2,36%) şirkətlərindən ibarətdir.
Gürcüstanın Kulevidə yerləşən Qara dəniz terminalının sahibi Azərbaycanın Respublikasının Dövlət Neft Şirkətidir (SOCAR). Batumidəki terminalın sahibi isə Qazaxıstanın "KazMunayQaz" şirkətidir.
