Azərbaycan, Bakı, 29 aprel / Trend /
SOCAR şirkəti (Azərbaycan Dövlət Neft Şirkəti) iki yeni dəniz platformasının (2415 və 2521 saylı) istifadəyə verilməsi və platformalardan birində (2387 saylı) yeni quyuların qazılması hesabına şirkətin şəxsi vəsaitləri hesabına istismar etdiyi "Neft Daşları" iri dəniz neft yatağında sutkalıq hasilatı 400-450 ton artırmağı planlaşdırır. Bu barədə SOCAR-ın məlumatında bildirilir.
Şirkət "Neft Daşları-2387" platformasında yeni quyu istifadəyə verib. Onun dərinliyi 1554 metr, sutkalıq debiti isə 15 tondur. Hazırda platformada beş quyu istismar olunur, ümumi sutkalıq debit 80 ton neft təşkil edir.
Həmçinin yaxın günlərdə yataqda yeni "Neft Daşları -2415" platformasının istifadəyə verilməsi planlaşdırılır. Hazırda platformada sınaq quyusunun qazılması üçün hazırlıq işləri aparılır. Platformadan 12 quyunun qazılması planlaşdırılır.
SOCAR ilin sonunadək daha bir ikibloklu platformanı - "Neft Daşları-2521"i istismara vermək niyyətindədir. Platformanın hər iki bloku artıq dənizdə yerləşdirilib, onlar dənizin dibinə bərkidiləcək.
Bu tədbirlər Azərbaycan Prezidentinin "Neft Daşları" Neft-Qaz Çıxarma İdarəsində (NQÇİ) hasilatın 812 min tondan 1,2 mln. tonadək (1,5 dəfə) artırılması ilə bağlı sərəncamı çərçivəsində həyata keçirilir. SOCAR geoloqlarının qiymətləndirmələrinə görə, "Neft Daşları" yatağında neft ehtiyatlarının qalıq həcmi 30 milyon ton təşkil edir. SOCAR yataqda neft hasilatının artırılması üçün 2010-cu ilədək daha 78 yeni quyu qazacaq.