Azərbaycan, Bakı, 26 may / Trend , müxbir E.İsmayılova /
"Azəri-Çıraq-Günəşli" (AÇG) yatağı neft hasilatının artırılmasını nəzərdə tutan Chirag oil project (COP) çərçivəsində yeni platformanın tikintisinin gələn il başa çatdırılması planlaşdırılır", - SOCAR-ın yüksək vəzifəli nümayəndəsi deyib. Layihənin dəyəri 10 milyard dollardır.
"Layihə hazırdır. Layihə bu il üçün büdcə xərclərinin müəyyən maddəsində nəzərdə tutulub. Gələn il bilavasitə tikinti işləri başlayacaq", - mənbə deyib.
Hazırda ilkin hesablamalar aparılır ki, onlara əsasən layihənin qiyməti 10 milyard dollar həcmində dəyərləndirilir. "Ancaq bir neçə il ərzində tikinti materiallarının qiyməti dəyişə bilər. Azalma və ya artırılmaya tərəf bəzi dəyişikliklər edilə bilər", - mənbə deyib.
Tikinti işləri platformanın tikintisindən əlavə olaraq boru kəmərlərinin tikintisi və qazma işlərinin aparılmasını nəzərdə tutur.
Mənbə deyib ki, bu layihə AÇG-dən neft hasilatını maksimallaşdırmaq və intensivləşdirmək imkanı verəcək.
Layihə üçün sanksiya artıq bu ilin sonunda verilə bilər. Hazırda Amerikanın KBR şirkəti COP-un layihələndirilməsini həyata keçirir. Bu şirkət yataqda qurulacaq platformanın layihələndirilməsini də həyata keçirəcək.
KBR şirkəti artıq AÇG-nin indiyəqədərki mərhələlərinin layihələndirilməsini həyata keçirib.
"Çıraq-1" və "Dərinsulu Günəşli" platformaları arasında yeni hasilat platformasının qurulmasını nəzərdə tutan bu layihənin realizəsi nəticəsində Azərbaycan yüngül neftinin sutkalıq hasilatı 100 min barelə çatdırılacaq. Ümumilikdə bu layihənin realizəsi çərçivəsində (AÇG müqaviləsinin bitmə müddəti olan 2024-cü ilə qədər) 300 milyon barel neft əldə edilməsi planlaşdırılır.
170 metr dərinlikdə quraşdırılacaq COP platforması 48 quyunun qazılmasına hesablanıb. Yeni platformanın dizaynı yatağın şərq hissəsində quraşdırılmış platfotma ilə uyğunluq təşkil edəcək.
COP layihəsində mövcud infrastrukturdan istifadə olunacaq: BP-nin Səngəçaldakı terminala qədər uzanan sualtı 30 düymlük neft kəməri və 28 düymlük qaz kəməri, eləcə də bu terminalda emal üçün lazım olan bəzi avadanlıqlar.
Bu layihədə neft ehtiyatları 331 milyon barel həcmində qiymətləndirilir. Tikintisinin 2013-cü ildə başa çatdırılması gözlənilən platformadan 28 hasilat və 17 basma quyuları qazılacaq. İlk neft hasilatı 2013-cü ilin üçüncü rübündə başlayacaq.
Layihənin realizəsinin sürətləndirilməsi üçün "Dədə Qorqud" qazma qurğusundan qabaqlayıcı qazma işləri həyata keçiriləcək.
BP-nin operator olduğu AÇG yataqlarında yeni platformaların quraşdırılması "Balaxanı lay dəstəsi"nin işlənməsi üçün vacibdir. Bunun üçün iki platforma tikilməlidir. Onlardan biri "Çıraq" və "Günəşli" yatağının dərinsulu hissəsinin, digəri isə "Azəri" yatağının qərb, şərq və mərkəzi hissəsni əhatə etmək üçündür.
Məqalə müəllifi ilə əlaqə ünvanı: [email protected]