Azərbaycan, Bakı, 10 iyun / Trend , müxbir Ü.İsmayılova /
Qətər fəal surətdə Azərbaycanla ticarət və iqtisadi əlaqələrini inkişaf etdirmək niyyətindədir, çərşənbə günü Azərbaycanda Qətərin mədəniyyət gününə həsr edilmiş tədbir çərçivəsində, Qətərin investisiya və ticarət departamentinin direktoru Xalid Yusif bildirib.
"Azərbaycan və Qətərin iqtisadiyyatı hər iki ölkədə böyük neft və qaz yataqlarının olmasına görə oxşardır",- Yusif bildirib.
Onun sözlərinə görə, Qətər Azərbaycanla neft-qaz hasilatı və nəqli sferasında öz təcrübəsini bölüşməyə hazırdır. "Neftin strateji borularla nəqli çox ciddi və vacib işdir və biz bu sferada öz təcrübəmizi bölüşə bilərik", - Yusif bildirib.
Departament direktorunun sözlərinə görə, Qətərdə neft-qaz sferasından başqa, informasiya texnologiyaları, nəqliyyat sistemi, neft-kimya məhsullarının istehsalı, turizm və s. inkişaf edib.
"Qətərdə daşınmaz əmlak sferası ən inkişaf etmiş sahələrdən biridir və ölkə dünya maliyyə böhranı nəticəsində yaranmış vəziyyət və daşınmaz əmlakın qiymətinin ucuzlaşmasından istifadə edərək dünyanın bir çox ölkələrində daşınmaz əmlak alır. Azərbaycan bu siyahıya daxil edilə bilər", - Yusif bildirib.
Departamentin direktoru, həmçinin bəyan edib ki, hazırda Qətər və Azərbaycan arasında ticarət dövriyyəsi kiçikdir və tərəflər bu rəqəmi hər iki ölkənin iqtisadiyyatının müxtəlif sahələrində investisiya mübadiləsi nəticəsində artırmaq niyyətindədir.
Azərbaycan Dövlət Statistika Komitəsinin məlumatına görə, yanvar-martda Azərbaycan və Qətər arasında ticarət dövriyyəsi 1,3 min manat təşkil edib və bu, Azərbaycanın ixracının payına düşüb.
Məqalə müəllifi ilə əlaqə ünvanı: [email protected]
