Azərbaycan, Bakı, 06 iyul / Trend , müxbir S.Əliyev /
"Bu il "Azəri-Çıraq-Günəşli" (AÇG) yataqlar blokunu işlədən Azərbaycan Beynəlxalq Əməliyyat Şirkəti (ABƏŞ) proqnozlaşdırılan 34 milyon tondan daha çox - 40 milyon ton neft hasil edəcək ki, bu da ümumilikdə Azərbaycan üzrə neft hasilatı proqnozunun 45 milyon tondan 50 milyon tona qalxmasına gətirib çıxaracaq", - bazar ertəsi Azərbaycanın neft-qaz sənayesindəki mənbə məlumat verib. Bu il üçün hasilat həcmi "AÇG" yataqlar blokundakı problemlər nəzərə alınaraq proqnozlaşdırılıb.
"Hazırda "Azəri-Çıraq-Günəşli"də hasilat sutkada təxminən 900 min barel təşkil edir ki, bu da proqnoz göstəricisinin artması barədə danışmaq imkanı verir", - mənbə bildirib.
Ötən il planlaşdırılan neft hasilatı həcmi 52 milyon ton həcmində proqnozlaşdırılırdı, ancaq "Azəri" yatağının mərkəzi hissəsində hasilatın dayanması üzündən buna nail olmaq mümkün olmayıb. Ötən ilin yekunlarına görə, hasilat 44,5 milyon ton təşkil edib.
"Mərkəzi Azəri" platformasında dayanma sentyabrın 17-də, platformanın yanında dənizdə qaz tullantıları üzündən baş verib. Hazırda "Azəri-Çıraq-Günəşli"də hasilat sutkada təxminən 900 min barel təşkil edir ki, bu da dayanmaya qədər olan həcmə bərabərdir.
Bir müddət əvvəl Azərbaycanın sənaye və energetika naziri Natiq Əliyevin dediyi kimi, Azərbaycanın bir neçə il ərzində hasilatı artırmaq üçün böyük potensialı var. Respublika ildə 65 milyon ton neft hasil edə bilər.
Məqalə müəllifi ilə əlaqə ünvanı: [email protected]
