Qazaxıstan, Astana, 08 iyul / Trend , K.Konırova /
İran ərazisindən keçməklə neft kəmərinin tikintisi ideyası istisna edilmir, - Astanada Trend -ın müxbirinin suallarını cavablandıran Qazaxıstanın enerji və mineral ehtiyatlar naziri Sauat Mınbayev deyib.
"Digər istiqamətlərdə olduğu kimi, İran ərazisi ilə də neft kəməri tikintisi istisna edilmir", - Mınbayev bildirib.
Əvvəl verilən məlumatlara görə, Vaşinqtonda Karnegin Fondunun beynəlxalq sülh naminə Rusiya-Avrasiya proqramının aparıcı elmi işçisi Marta Olkot Astanada NATO Parlament Assambleyasının "Rouz-Rot" seminarında çıxışı zamanı bildirib ki, Mərkəzi Asiya (MA) ölkələri Rusiyadan yan keçməklə İran vasitəsilə neft kəmərinin tikintisi imkanlarına diqqət ayırmalıdır.
"Mən həm ABŞ, həm də Aİ-də Rusiyadan yan keçməklə Avropaya alternativ boru kəməri sisteminin yaradılması haqda qərar qəbul edənlərin çıxışlarını çox eşitmişəm. Lakin heç vaxt İranın bu sistemə qoşulması imkanlarına ciddi baxıldığı bərədə eşitməmişəm. ABŞ-dan olan iki siyasətçinin "boru kəmərləri İrandan keçsə, bu, MA ölkələrinin xeyrinə olmayacaq" fikrini də eşitmişəm. Lakin MA nümayəndələri onların milli maraqlarına uyğun olan qərarı özləri verməlidirlər, onların İranla da yaxşı münasibətləri var," - Olkot üç həftə bundan əvvəl Astanada deyib.
Onun tövsiyələrinə cavab olaraq, Trend -a müsahibəsində Qazaxıstanın yüksək vəzifəli neftçilərindən biri anonimliyi qorunmaq şərtilə deyib ki, Qazaxıstan əvvəllər də marşrutun İran vasitəsilə çəkilməsi fikrini nəzərdən keçirib.
"Biz əvvəllər də Amerika ekspertlərinin fikirləri olmadan İran vasitəsilə neft kəmərinin tikintisi imkanlarını araşdırmışıq, belə ki, bu, neftimizin həmçinin quru vasitəsilə dünya bazarına çıxarılması üçün ən sərfəli və qısa yoldur", - həmsöhbətimiz bildirib.
O həmçinin qeyd edib ki, Qazaxıstandan başlayacaq neft kəməri Özbəkistan, Türkmənistan, daha sonra isə İrandan keçə bilər. "İranın neft kəməri tikintisi üçün gözəl imkanları var. Bu ölkədə biznes işlərini aparmaq üçün də geniş imkanlar var. İranla bağlı bütün təhlükəli fikirlər cəfəngiyatdır," - neftçi həmin ölkədə qeyri-sabit vəziyyətin layihələrə təsir etmək ehtimalları ilə bağlı suala cavab verərkən deyib.
Trend -ın müxbirinin İran vasitəsilə Qazaxıstandan başlayacaq cari və gələcək marşrutların Çin istiqamətində olan boru kəmərləri ilə rəqabət apara biləcəyi haqda sualına enerji naziri Mınbayev belə cavab verib: "Çin neft kəməri, demək olar ki, artıq tikilib və oktyabrda istifadəyə veriləcək. Bu kəmər yalnız 20 milyon ton ötürəcək".
Bundan əlavə, enerji naziri Tengiz neftinin də Çin istiqamətində olan neft kəməri ilə ötürülməsi imkanını da istisna etmir. "Əgər Çin üçün də qiymət uyğun olarsa, niyə də olmasın?! Hər şey neftin qiymətindən asılıdır. Neft qiymət münasib olan yerə gedir", - Mınbayev deyib.
Məqalə müəllifi ilə əlaqə: [email protected]
