Azərbaycan, Bakı, 03 avqust / Trend , müxbir E.İsmayılov /
ARDNŞ bu aya planlaşdırılan Azərbaycan neftinin Bakı-Novorossiysk (qərb istiqaməti) boru kəməri ilə ötürülməsi prosesinə başlayıb, bu barədə bazar ertəsi neft-qaz bazarındakı mənbədən bildirilib. Neftin ötürülməsi avqustun 27-nə kimi davam etdiriləcək.
"Boru kəməri ilə bu ay ərzində nəql edilməsi planlaşdırılan həcmlərin ötürülməsinə başlanılıb", - mənbədən bildirilib.
Mənbədən bildirildiyi kimi, hazırda Bakı-Novorossiysk boru kəməri ilə neftin orta sutkalıq ötürülməsi 10 min ton təşkil edir.
Proqnozlara əsasən, iyulda olan 248 min tona nisbətdə avqustda 240 min tona yaxın Azərbaycan neftinin boru kəməri ilə nəql edilməsi planlaşdırılır. Proqnoza müvafiq olaraq sentyabrda boru kəməri ilə 140 min ton, oktybarda 248 min ton, noyabrda 240 min ton, dekabrda isə 140 min ton neft nəql edilməsi planlaşdırılır.
Mənbənin əvvəlcədən bildirdiyi kimi, avqustda texniki işlərin keçirilməsi ilə əlaqədar olaraq Azərbaycan neftinin Bakı-Novorossiysk boru kəməri ilə nəqli cəmi 24 saat olmaqla üç dəfə dayandırılacaq. Qrafikə müvafiq olaraq, neftin boru kəməri ilə ötürülməsi avqustun 12, 18 və 25-də hər gün səkkiz saat olmaqla dayandırılacaq.
Novorossiysk limanı vasitəsilə ARDNŞ neftinin yükboşaltmasını həyata keçirir. ARDNŞ-in məlumatlarına əsasən, yanvar-iyun aylarında Bakı-Novorossiysk borukəməri ilə 1,2 milyon ton neft ixrac edilib.
2009-cu ildə ARDNŞ Bakı-Novorossiysk boru kəməri ilə neft ixracını 2008-ci ildəki 1,3 milyon tona nisbətdə 2,5 milyon tona kimi artımağı planlaşdırır.
Hazırda Bakı-Novorossiysk boru kəməri ilə neft ixracı zamanı Azərbaycan çıxışda (Novorossiysk limanında) digər istehsalçıların nefti ilə qarışan Urals markalı neft əldə edir.
Məqalə müəllifi ilə əlaqə ünvanı:: [email protected]