Azərbaycan, Bakı, 12 avqust / Trend , müxbir N.İsmayılova /
Azərbaycanda alternativ enerji mənbələrinin yaradılması üzrə ikinci proqramın qəbul edilməsi mümkündür. Bu barədə çərşənbə günü Azərbaycanın sənaye və energetika nazirinin müavini Gülməmməd Cavadov bildirib.
"Ölkədə birinci proqramın icrası artıq başa çatıb, nazirlik tərkibində alternativ enerji üzrə agentlik yaradılıb. Gələcəkdə bu agentlik tam fəaliyyətə başlayan zaman bu sahədə daha bir proqramın yaradılması mümkündür", - Cavadov bidlirib.
Onun sözlərinə görə, Azərbaycanda hazırda elektrik enerjisi istehsalı obyektlərinin hasilat gücü ildə 20 milyard kilovat/saatı ötür.
"Hazırda elektrik enerjisinin qənaətlə işlədilməsi və elektrik enerjisi itkisinin həcminin azaldılması tendensiyası yaranıb, buna görə də istehsal obyektləri artırılarsa, o zaman onlar ixraca yönələcək", - Cavadov bildirib.
Azərbaycan Prezidentinin 2009-cu il iyulun 16-da verdiyi sərəncama əsasən Sənaye və Energetika Nazirliyi yanında Alternativ və Bərpa Olunan Enerji Mənbələri üzrə Dövlət Agenliyi yaradılıb.
Azərbaycan Prezidenti İlham Əliyevin ilin birinci yarısında sosial-iqtisadi inkişafın yekunlarına dair Nazirlər Kabinetinin iclasında çıxışı zamanı bildirdiyi kimi, Azərbaycan mütləq alternativ enerji mənbələrinin yaradılması üzərində çalışmalıdır, ilk növbədə isə ölkənin kiçik çaylarında kiçik su elektrik stansiyaları inşa etmək lazımdır.
Bu sahəyə həm yerli, həm də əcnəbi şirkətlər cəlb edilə bilər. Dövlət başçısının bildirdiyi kimi, növbəti ildən Azərbaycanın dövlət büdcəsi hesabına pilot layihələr qismində külək və günəş enerjisinin istehsalı üçün praktiki işlər həyata keçiriləcək.
Məqalə müəllifi ilə əlaqə ünvanı: [email protected]