Azərbaycan, Bakı, 21 avqust / Trend , müxbir E.İsmayılov /
Hazırda ARDNŞ-in (Azərbaycan Respublikası Dövlət Neft Şirkəti) "Azəriqaz" İstehsalat Birliyi Azərbaycanın qaz sisteminə sutkada orta hesabla təxminən 25-26 milyon kubmetr qaz göndərir. Bunu cümə günü ARDNŞ-dəki mənbə deyib.
"İndi qaz sisteminə qaz bir qədər az (payız-qış mövsümünə nisbətən) verilir və bu rəqəm təxminən 25-26 milyon kubmetrdir", - mənbə deyib. İB-nin payız-qış mövsümündə ölkənin qaz sisteminə verəcəyi qazın həcmini mənbə açıqlamayıb.
Onun sözlərinə görə, qaz sisteminə daxil olan qazın ümumi həcmindən təxminən 6,5-7 milyon kubmter soyuq vaxtlarda istifadə olunmaq üçün qaz anbarlarına doldurulur.
Azərbaycanda cəmi iki yeraltı qaz anbarı var. Bunlardan biri işlək həcmi 500 milyon kubmetr olan Qaradağ, ikincisi isə işlək gücü 1,1 - 1,2 milyard kubmetr olan Kalmaz anbarıdır.
Bu il 2009-2010-cu illərin payız-qış mövsümündə istifadə üçün Azərbaycanın yeraltı qaz anbarlarına 1,8 - 1,9 milyard kubmetr qaz doldurulması planlaşdırılır, bir müddət əvvəl ARDNŞ prezidenti Rövnəq Abdullayev deyib.
Hazırda ARDNŞ Azərbaycanın hər iki qaz anbarının gücünün genişləndirilməsi üçün iş aparır. Qaradağ qaz anbarının genişləndirilməsinin birinci fazası çərçivəsində onun işlək gücünün 1,4 milyard kubmetrə, ikinci faza çərçivəsində isə bu göstəricinin 2,3 milyard kubmetrə çatdırılması planlaşdırılır.
Abdullayevin fikrincə, yaxın zamanda Azərbaycanın yeraltı qaz yataqlarına 3 milyard kubmetrə yaxın qaz doldurula bilər, perspektiv üçüncü mərhələdə isə bu rəqəm 5 milyard kubmetrə çatdırıla bilər. Bu, Azərbaycanın daxili bazarının qaz təminatını artırmağa imkan verəcək və ölkənin ixrac imkanlarını əhəmiyyətli dərəcədə genişləndirəcək.
Məqalə müəllifi ilə əlaqə ünvanı: [email protected]