Azərbaycan, Bakı, 08 yanvar / Trend /
2009-cu il ərzində "Bakı-Tbilisi-Ceyhan" (BTC) neft kəmərinin orta illik əməliyyat effektivliyinin göstəricisi 98,4 faiz təşkil edib. Bu barədə Botas International Limited (BIL) şirkətinin rəsmi saytında yayılmış məlumatda deyilir. BIL xarici şirkətlərlə əməkdaşlıq əlaqələrinin yaradılması üçün Türkiyənin Dövlət Boru Şirkəti Botaş tərəfindən təsis edilib. 2001-ci ildə şirkət BTC neft kəmərinin istismara verilməsi məqsədi ilə yenidən təşkil edilib.
Ötən ilin oktyabr ayının yekunları üzrə BTC-nin effektivliyi 100 faiz təşkil edib.
BIL Ceyhan terminalından neft göndərilməsinə 2006-cı il iyunun 2-dən başlayıb. Bu tarixdən etibarən şirkət 1000 tanker göndərib.
ВТС ilə əsasən Azərbaycanın Azeri Light markalı yüngül nefti və kiçik həcmdə Qazaxıstanın "Tengiz" yatağından çıxarılan neft nəql olunur. Tengiz neftinin BTC vasitəsilə nəqlinə ötən ilin oktyabrında başlanılıb.
BTC boru kəmərinin ümumi uzunluğu 1768 kilometrdir. Bunun 443 kilometri Azərbaycan, 249 km-i Gürcüstan, 1076 km-i isə Türkiyə ərazisindən keçir. Boru kəmərinin tikintisi 2003-cü ildə, onun neftlə doldurulması isə 2005-ci il mayın 18-də başlanıb.
BTC-nin inşası dörd milyard dollara başa gəlib. Tikinti işləri üzrə bu xərclərə boru kəmərinin doldurulması, maliyyə xərcləri və bank faizlərinin gəlirləri daxil deyil. Maliyyə kreditinin ümumi məbləği 2,6 milyard dollar təşkil edir.
BTC Co-nun səhmdarları aşağıdakılardır: BP (30,1%); AzBTC (25%); Chevron (8,90%); Statoil (8,71%); ТРАО (6,53%); Eni (5%); Total (5%); Itochu (3,40%); Inpex (2,50%); ConocoPhillips (2,50%) və Amerada Hess (2,36%).
