Azərbaycan, Bakı, 27 fevral / Trend /
Iyul ayına qədər İran ərazisindən keçən "Sülh" boru kəmərinin bir hissəsi tikilib qurtarılacaq və o qazla doldurulacaq. Bu barədə LİNA agentliyi məlumat verir.
"Sülh" boru kəmərinin tikintisinin birinci fazası (Bəndər Abbas-İranşəhər) baş çatıb və yalnız 35 kilometrlik ikinci fazasının (Üsluviyə-Bəndər Abbas) tikilib başa çatması qalıb ki, bu da ilin sonuna kimi həyata keçiriləcək. Bu barədə İranın Qaz inkişafı və mühəndisliyi şirkətinin icraçı direktoru Əlirza Qəribi deyib.
Onun sözlərinə görə, boru kəmərinin tikintisinə bu vaxta qədər 1 milyard 500 milyon dollar kapital qoyulub. Bu boru kəməri vasitəsilə İranın Sistan və Belucistan və Hörmüzqan vilayətlərinin həm şəhər həm də kəndləri qazla təchiz ediləcək.
Diametri 56 düym olan bu boru kəmərinin uzunluğu 90 kilometrdən çoxdur, o deyib. Boru kəməri İranın Üsluviyə şəhərindən başlayaraq Buşer, Hörüzqan vilayətləri ərazilərindən keçərək Pakistanla sərhəddə yerləşən Sistan və Belucistan vilayətlərinədək uzanacaq.
Qəribinin sözlərinə görə, boru kəməri sutkada 110 milyon kub metr qaz nəql etmək imkanına malikdir. Bu həcmin 50 milyon kub metri ölkə daxilində istifadə oluncaq, 60 milyon kubmetri isə ixrac olunacaq.
Iran daxilində uzunluğu 1145 kilometr olan 42 düymlük boru kəməri vasitəsilə Zahidan, Çabahar, Zabul, Mircəva, Haş, Cireft, Kohnuç, Bəndər Abbas şəhərləri və bu şəhərlərin kəndləri qazla təchiz olunur.
Qəribinin sözlərinə görə, boru kəməri Pakistan sərhəddinə kimi uzanacaq və orada həmin ölkənin ərazisində yerləşən boru kəmərləri ilə əlaqələnəcək.
