Azərbaycan, Bakı, 6 iyul /Trend, müxbir E.İsmayılov/
ARDNŞ (Azərbaycan Respublikası Dövlət Neft Şirkəti) "Şahdəniz" qaz-kondensat yatağının işlənməsinin ikinci mərhələsi çərçivəsində kommersiya danışıqlarının aparılması və digər qeyri-kommersiya məsələlərinin həlli məsələsində əsas rolu öz üzərinə götürməyə hazırlaşır. Bu barədə çərşənbə axşamı ARDNŞ-nin yüksəkvəzifəli nümayəndəsi bildirib.
"Bizdə [ARDNŞ-də] tərəfdaşlarla görüş oldu, orada gələcək fəaliyyəti müəyyən edən məsələlərin dairəsi müzakirə olundu. ARDNŞ "Şahdəniz" layihəsi tərəfdaşlarının lideri kimi çıxış edir. [...] Mandat aldıqdan sonra biz artıq həm Türkiyə, həm də Azərbaycan tərəfini təkcə ARDNŞ-nin şəxsində deyil, digər tərəfdaşları da qane edə biləcək hərtərəfli kommersiya danışıqları apara bilərik", - şirkət nümayəndəsi bildirib.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: bp (operator) - 25,5%, Statoil - 25,5%, NICO - 10%, Total - 10%, LukAgip - 10%, TPAO - 9%, ARDNŞ - 10%. "Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
Hazırda Gürcüstana və Türkiyəyə qaz Cənubi Qafqaz boru kəməri ilə nəql olunur.
Yatağın işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə daha 16 milyard kubmetrədək çatdırmaq mümkün olacaq.
Bundan əvvəl Azərbaycan və Türkiyə Azərbaycan qazının ikincinin ərazisindən tranziti ilə bağlı paket sazişi imzalayıblar. Hazırda, ARDNŞ nümayəndəsinin sözlərinə görə, bu istiqamətdə işlər davam etdirilir və müzakirələr aparılır.
