Azərbaycan, Bakı, 13 iyul /Trend, müxbir A.Bədəlova/
Nabucco Gas Pipeline International bundan sonra "Nabukko" qaz kəmərini layihələşdirən beş tranzit ölkənin hər birində - Avstriya, Bolqarıstan, Macarıstan, Rumıniya və Türkiyədə törəmə şirkətlərə malik olacaq. "Nabukko" layihəsinin rəsmi nümayəndəsi Kristian Dolezalın electron poçtla Trend-ə verdiyi məlumata görə, Ankarada yerləşən Nabucco Gas Pipeline International GmbH (NIC) törəmə şirkətinin bazasında rəsmən Nabukko Milli Şirkəti (NNC Turkey) təsis olunub.
Dolezalın dediyi kimi, təsis olunan şirkət "Nabukko" qaz kəmərinin Türkiyədəki hissəsinin inkişafı və tikintisi üçün məsuliyyət daşıyır. Bundan əlavə, şirkət boru kəmərinin Türkiyəyə məxsus hissəsində lokal injinirinq nəzarətini və idarə edilməsini, ətraf və sosial mühitə təsirin qiymətləndirilməsini həyata keçirəcək.
Nabucco Gas Pipeline International apreldə "Nabukko" qaz kəmərinin Türkiyəyə məxsus hissəsi üçün genişləndirilmiş əsas və müfəssəl injinirinqin keçirilməsi üzrə tender elan etmişdi.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Yunanıstan, eləcə də Türkiyə ilə İran arasında yerdə qalan hissəsinin tikintisi daxildir.
Dəyəri 7,9 milyard avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2014-cü ildə start veriləcək. Boru kəmərinin maksimal gücü ildə 31 milyard kubmetrə bərabərdir. Layihənin iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir. Layihənin ümumi dəyərinin təxminən 30 faizi layihədə iştirak payı əsasında Nabucco Gas Pipeline International-ın səhmdarları tərəfindən ödəniləcək, qalan 70 faizi isə kreditorların hesabına maliyyələşdiriləcək.
