Azərbaycan, Bakı, 23 iyul /Trend, müxbir E.İsmayılov/
Gürcüstan Qazaxıstan neftinin nəqli üçün nəzərdə tutulan yeni "Bakı-Qara dəniz" neft kəməri layihəsinin tikintisinin həyata keçirilməsi üzrə istənilən mərhələyə qoşulmağa hazırdır. Bu barədə cümə günü Bakıda Gürcüstanın energetika naziri Aleksandr Xetaquri deyib.
"Mən bilirəm ki, Azərbaycan tərəfi Qazaxıstan tərəfi ilə bu layihə üzrə qarşılıqlı anlaşma memorandumunu artıq imzalayıb. Əgər gələcəkdə bu istiqamət üzrə Azərbaycan və Qazaxıstan tərəfləri arasında danışıqlar davam etsə, gürcü tərəfi istənilən mərhələdə qoşulmağa və bu layihədə iştiraka razılıq verməyə hazırdır", - Xetaquri deyib.
Layihədə yeni neft kəmərinin Qazaxıstan neftini, xüsusilə "Kaşaqan" yatağından olan nefti Azərbaycan və Gürcüstan əraziləri vasitəsilə Avropa bazarlarına çıxarmaq məqsədilə tikintisi nəzərdə tutulur. Layihə Qazaxıstandan neft tədarükünün istiqamətlərini diversifikasiya etməyə yönəldilib.
Bundan öncə, Azərbaycan və Qazaxıstan "Bakı-Qara dəniz" neft kəməri üzrə əməkdaşlıq etmək niyyəti haqqında Memorandum imzalayıblar.
