Аzərbaycan, Bakı, 23 iyul /Trend,
müxbir E.İsmayılov/
Bir neçə il ərzində Gürcüstan London Fond Birjasında Dövlət Neft və Qaz Korporasiyası səhmlərinin minoritar (15-20%-dək) paketini yerləşdirmək niyyətindədir. Bu barədə cümə günü Bakıda Gürcüstanın energetika naziri Aleksandr Xetaquri bildirib.
Onun sözlərinə görə, hazırkı vəziyyətdə söhbət magistral qaz kəmərinin özəlləşdirilməsindən deyil, sadəcə, Neft və Qaz Korporasiyası səhmlərinin minoritar paketini yerləşdirməkdən gedir.
"Bizim heç vaxt qaz kəmərini özəlləşdirmək fikrimiz olmayıb və biz heç vaxt bu qaz kəmərini özəlləşdirməyəcəyik. Söhbət Neft və Qaz Korporasiyası səhmlərinin minoritar paketini London birjasında yerləşdirməkdən gedib. Növbəti iki-üç il ərzində biz minoritar paketin 15-20%-ə qədərini yerləşdirəcəyik", - Xetaquri deyib.
Gürcüstanda magistral qaz kəməri səhmlərinin alınmasına ən böyük marağı magistral qaz kəmərlərinin istismarında böyük təcrübəyə malik ARDNŞ (Azərbaycan Respublikası Dövlət Neft Şirkəti) göstərir. Bu gün ARDNŞ öz qazını xüsusi olaraq Gürcüstana ixrac edir.
Bundan əvvəl Qazaxıstanın "QazMunayQaz" və Rusiyanın "Qazprom" şirkətləri qaz kəmərində pay iştirakı qazanmaqda maraqlı olduqlarını bildirmişdilər.