Azərbaycan, Bakı, 14 avqust/Trend, müxbir E.İsmayılov/
Hazırda ARDNŞ ortamüddətli müqavilə çərçivəsində Rusiyaya sutkada üç milyon kubmetrə yaxın qaz ixrac edir. Bu barədə şənbə günü neft-qaz bazarındakı mənbə bildirib.
"İndi Rusiyaya üç milyon kubmetrə yaxın qaz ixrac edilir, lakin bəzən bu göstərici Rusiya tərəfindən qəbulun azalması səbəbindən enir", - mənbə deyib.
Rusiya ilə Azərbaycan qazının alqı-satqısı barədə ortamüddətli müqavilə (müddətin uzadılması mümkünlüyü ilə) ARDNŞ ilə "Qazprom" arasında Bakıda oktyabrın 14-də imzalanıb. 2010-2014-cü illəri əhatə edən müqaviləyə görə, Azərbaycan tərəfi hər il Rusiyaya 500 milyon kubmetr həcmində qaz nəql etməlidir. Müqavilədə qaz nəqlinin həcminin həddi göstərilməyib. ARDNŞ yarım il əvvəldən şirkətin nəql edə biləcəyi həcm barədə qarşı tərəfə xəbər verməlidir. Azərbaycan qazının Rusiyaya nəqlinə bu ilin yanvarın birindən başlanılıb.
Cari ildə Rusiyaya bir milyard kubmetr Azərbaycan qazı ixrac olunacaq. "Qazprom" və ARDNŞ eləcə də 2011-ci ildə Rusiyaya ixrac olunacaq qazın həcmlərini razılaşdırıblar. Gələn il bu göstərici iki milyard kubmetrə yaxın təşkil etməlidir.
ARDNŞ-nin Gürcüstana qaz ixracının sutkalıq həcmi 0,4-0,45 milyon kubmetrə yaxın təşkil edir.
ARDNŞ Gürcüstana qaz nəqlini Qazax rayonu ərazisində iki ölkəni birləşdirən boru kəməri vasitəsilə gürcü bazarındakı fəaliyyəti çərçivəsində həyata keçirilir. Bu kəmərlə qaz ixracının gücü ildə 3 milyard kubmetr qaz təşkil edir. 2008-ci ilin noyabrında Azərbaycanla Gürcüstan arasında müqavilə imzalanıb. Müqavilə 2009-cu ildən başlayaraq sonrakı beş il ərzində Gürcüstanın qaz bazarında ARDNŞ-nin fəaliyyətinin fəallaşdırılması imkanlarını nəzərdə tutur. Memoranduma əsasən, ARDNŞ layihənin realizəsi üçün Gürcüstan hökumətinin müəyyənləşdirdiyi qaz istehlakçıları qruplarını (sosial qruplar) təmin edəcək törəmə müəssisə yaradır.
Hazırda Azərbaycandan İrana nəql edilən qazın həcmi sutkada 1,1 milyon kubmetr təşkil edir və qaz həcminin hamısı svop əməliyyatı çərçivəsində Naxçıvan Muxtar Respublikasının tələbatını ödəmək üçün tədarük edilir.
Azərbaycan və İranı uzunluğu 1474,5 km olan "Qazıməmməd - Astara - Bind-Biand" qaz kəməri birləşdirir. Qaz kəmərinin Azərbaycan ərazisindəki hissəsinin uzunluğu 296,5 kilometrdir. Onun buraxılış gücü ildə 10 milyard kubmetrdir. Bu marşrut 1971-ci ildə istismara verilən Qazax - Astara - İran boru kəmərinin qoludur. Onun üzərində Qazıməmməd, Ağdaş və Qazaxda üç kompressor stansiyası tikilib. Qaz nəqliyyatı sistemi 55 atmosfer təzyiqinə hesablanıb. Boru kəmərinin diametri 1200 mm-dir.
