Azərbaycan, Bakı, 2 sentyabr /Trend/
ARDNŞ "8 Mart" və "Bulla-dəniz" yataqlarında yerləşən quyularda mobil modem texnologiyalarından istifadə etməklə informasiyanın Geofizika və Geologiya İdarəsindən Kompleks Qazma Trestinə ötürülməsi üçün "RT-Leuza" uzaq müşahidə sistemini quraşdırıb və zəruri tədbirləri görüb. Bu barədə Geofizika və Geologiya İdarəsinin yaydığı məlumatda deyilir.
Məlumatda deyildiyinə görə, ötürülmə üçün zəruri bütün tədbirlər "8 Mart" yatağının 731 saylı quyusunda və "Bulla-dəniz" yatağının 89 saylı quyusunda həyata keçirilib. Bu tədbirlər quyularda baş verən proseslərə nəzarət etmək üçün həyata keçirilir.
Real vaxtda uzaq müşahidə sistemi "Sahil" Qazma İdarəsi üçün də quraşdırılıb. Ümumilikdə, hazırda Kompleks Qazma Trestində belə müşahidə sistemi "Ümid" strukturunda, "8 Mart" və "Bulla-dəniz" yataqlarında müvafiq olaraq, 8, 731 və 89 saylı quyularda aparılır.
