Azərbaycan, Bakı, 16 sentyabr /Trend, müxbir E.İsmayılov/
"Nabukko" qaz kəməri layihəsi üçün Xəzərin Azərbaycan sektorundakı "Şahdəniz" qaz-kondensaı yatağı ilə yanaşı, Azərbaycanda digər qaz mənbələri də cəlb edilə bilər. Bu barədə cümə axşamı Bakıda "OMV Gas and Power" şirkətinin İcraiyyə Şurasının üzvü Verner Auli deyib.
Onun sözlərinə görə, işlənməsinə 25 milyard dollara yaxın vəsaitin lazım olduğu "Şahdəniz" yatağından ildə 16 milyard kubmetr qazın hasil edilməsi planlaşdırılıb. Bunun 8 milyardı "Nabukko" üçün cəlb edilə bilər. Aulinin fikrincə, qazın bir hissəsi Azərbaycandakı digər mənbələrdən də cəlb edilə bilər.
"Hazırda "Nabukko" üçün digər qaz mənbələri, xüsusilə də Türkmənistan və İraqdakı mənbələrlə bağlı da iş aparılır", - Auli bildirib. "OMV" İraqda böyük qaz layihəsinin iştirakçısıdır. Lakin İraq istiqamətində işlər üçün bu ölkədə siyasi vəziyyətin sabitləşməsi lazımdır.
Onun sözlərinə görə, İraq "Nabukko" üçün 15 milyard kubmetr qaz tədarük etməyə hazırdır. "Lakin mən əminəm ki, yaxın perspektivdə biz bu həcmi cəlb edə biləcəyik", - Auli qeyd edib.
Aulinin qənaətinə görə, "Nabukko"dakı həcmin təxminən 50 faizinin üçüncü tərəfə veriləcəyi nəzərdə tutulub, lakin konsorsium iştirakçıları qaz kəmərində öz həcmlərini tam cəlb etməsələr, üçüncü tərəflər üçün həcmlər 50 faizi ötə də bilər.
Yeni qaz layihələrinin həyata keçirilməsi Avropaya lazımdır. Çünki burada qaz istehsalının xeyli aşağı düşməsi müşahidə olunur. Bununla yanaşı, Avropaya idxal olunan qazın artması da müşahidə olunur və bu prosesdə aparıcı rol Rusiyaya aiddir. Odur ki, bu istiqamətdə qaz tədarükləri diversifikasiya edilməlidir.
Avropada qaz istehsalının həcminin aşağı düşməsinə baxmayaraq, mövcud qaz ehtiyatları cəlb edilə bilər. Lakin bu yatıb qalmış mənbələrdən qazı hasil etmək üçün təxminən 20 il lazımdır. "Bu onunla əlaqədardır ki, bu ehtiyatlar kifayət qədər dərinlikdə yerləşir. Buna görə də "Nabukko" Avropada artan qaz tələbatına cəlb edilə bilər", - Auli qeyd edib.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2015-ci ildə start veriləcək.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.
"Nabukko" qaz kəmərinin uzunluğu 2730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.
Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.