Azərbaycan, Bakı, 17 sentyabr /Trend, müxbir E.İsmayılov/
Türkmənistanda "Şərq-Qərb" qaz kəmərinin tikintisi bir çox əməkdaşlıq məsələlərini aydınlaşdırmağa imkan verəcək və enerjidaşıyıcıların nəqli üzrə fəaliyyəti genişləndirəcək. Bu barədə cümə günü sənaye və energetika naziri Natiq Əliyev deyib.
"Mənə elə gəlir ki, bu tikintinin həyata keçməsi ilə yəqin ki, məsələlərin çoxu aydınlaşacaq, çünki Türkmənistan Prezidenti də bildirib ki, bu, fəaliyyətimizi genişləndirməyə imkan verəcək", - Əliyev qeyd edib.
Əliyevin dünən İstanbulda keçirilən Türkdilli ölkələrin dövlət başçılarının sammiti çərçivəsində dediyinə görə, Türkmənistan-Azərbaycan-Türkiyə əməkdaşlıq oxu üçün fəaliyyətin gücləndirilməsi məsələsi nazirlər səviyyəsində müzakirə edilib.
"Biz Türkiyə və Türkmənistan nazirləri ilə dünən görüşdük. Türkmənistan-Azərbaycan-Türkiyə oxunun hazırlanması üçün fəaliyyətimizin gücləndirilməsi üzrə ümumi məsələni müzakirə etdik", - Əliyev qeyd edib.
Sammitin yekunları üzrə Türkmənistan Prezidenti Qurbanqulu Berdiməhəmmədovun dünən bəyan etdiyinə görə, Türkmənistan ərazisində "Şərq-Qərb" qaz kəməri layihəsi mənbələrin və Avropaya qaz tədarükü marşrutlarının diversifikasiyasına istiqamətlənən "Nabukko" qaz kəməri layihəsi ilə bağlıdır.
"Hazırda bizdə "Şərq-Qərb" qaz kəməri tikilir və bu qaz kəməri Xəzər dənizi sahilinədək çəkiləcək. Bu layihə ilə bağlı "Nabukko" layihəsi də var", - bundan əvvəl Türkmənistan Prezidenti bildirib.
Bu yaxınlarda Türkmənistanda ölkə üzrə üzunluğu 1000 km olan böyük magistral qaz kəməri "Şərq-Qərb"in tikintisinə start verilib. Yeni qaz kəmərinin buraxılış qabiliyyəti ildə 30 milyard kubmetr qaz təşkil edir, onun təxmini dəyəri iki milyard dollardır.
Layihənin əsas məqsədi Türkmənistanda vahid qaz təminatı sisteminin yaradılması və təbii türkmən qazının beynəlxalq bazarlara tədarükünün diversifikasiyalaşdırılmasından ibarətdir.
Dəyəri 7,9 mlrd. avro olan "Nabukko" qaz kəməri ilə Azərbaycan və Mərkəzi Asiyadan Aİ ölkələrinə qaz ixracı nəzərdə tutulur. Qaz kəmərinin çəkilişi 2011-ci ilə təyin edilib. İlk tədarüklərə 2015-ci ildə start veriləcək.
"Nabukko" qaz kəmərinin tikintisi iki əsas fazanın gedişində həyata keçiriləcək. Tikintinin birinci fazasına (2011-ci il) Türkiyə sərhədindən başlayaraq Avstriyanın Baumqarten şəhərində başa çatan 2 min kilometr uzunluğunda boru kəmərinin çəkilişi daxildir. İkinci fazaya (2014-2015-ci illər) boru kəmərinin Türkiyə və Gürcüstan, eləcə də Türkiyə ilə İraq arasında yerdə qalan hissəsinin tikintisi daxildir.
"Nabukko" qaz kəmərinin uzunluğu 2730 kilometr olan birinci hissəsinin tikintisinə Ankaranın (Türkiyə) cənub hissəsindən başlanacaq və qərb istiqamətində Mərkəzi Anadolu və Mərmərə dənizindən keçərək Bolqarıstan sərhədinədək uzanacaq. Bu marşrutun 75 faizi mövcud boru kəmərləri vasitəsilə çəkiləcək.
Layihə iştirakçıları Avstriyanın OMV, Macarıstanın MOL, Bolqarıstanın "Bulgargaz", Rumıniyanın "Transgaz", Türkiyənin "Botaş" və Almaniyanın RWE şirkətləridir. Onların hər biri bərabər paya - 16,67 faiz paya malikdir.
