Azərbaycan, Bakı, 5 oktyabr /Trend, müxbirlər S.Süleymanov, E.İsmayılov/
Hər il Azərbaycan ərazisi ilə 7 milyon Qazaxıstan və Türkmənistan nefti nəql olunur. Bu barədə çərşənbə axşamı ARDNŞ prezidenti Rövnəq Abdullayev Astanada "Kazenergy" V Avrasiya forumunda deyib.
Onun sözlərinə görə, neft respublika ərazisi ilə həm Bakı-Tbilisi-Ceyhan neft boru kəmərindən istifadə edilməklə, həm də Azərbaycan və Gürcüstanı birləşdiriən dəmiryol vasitəsilə nəql olunur.
Hazırda Azərbaycan vasitəsilə Qazaxıstan nefti nəqlinin həcminin artırılması üzrə işlər də görülür. Məsələn, bu məqsədlə Qazaxıstan neftinin nəqli üçün Transxəzər sisteminin yaradılması planlaşdırılır.
Abdullayevin sözlərinə görə, ARDNŞ və Qazaxıstanın "QazMunayQaz" şirkəti "Kaşaqan" və "Tengiz" yataqlarından neft nəqli üçün lazım olan Transxəzər sisteminin yaradılması layihəsinin həyata keçirilməsi üzrə işlər aparırlar.
Abdullayev bildirib ki, Azərbaycan ərazisində neft-qaz infrastrukturundan birgə istifadə üzrə məsələ də müzakirə edilməkdədir.
Transxəzər sistemi Qazaxıstan neftinin məhz "Kaşaqan"dan çatdırılması üçün yaradılır. 2008-ci ilin sonunda Bakıda Qazaxıstan və Azərbaycanın milli neft şirkətləri "QazMunayQaz" və ARDNŞ Transxəzər sisteminin yaradılması haqqında saziş imzalayıblar. Sənəd ilkin mərhələdə "Kaşaqan" yatağından əldə olunan Qazaxıstan neftinin Xəzər dənizi və Qafqaz vasitəsilə ildə 23 milyon ton həcmində (gələcəkdə 35-56 milyon ton artımla) dünya bazarlarına nəqlini nəzərdə tutur.