Azərbaycan, Bakı, 3 dekabr /Trend/
ARDNŞ-nin Neft Kəmərləri İdarəsi payız-qış mövsümünə hazırlıq çərçivəsində bəzi boru kəmərlərində təmir-bərpa işləri aparıb. Bu barədə ARDNŞ-nin Ekologiya İdarəsinin saytında yerləşdirilən məlumatda deyilir.
Məlumatda deyildiyinə görə, boru kəmərinin Şirvan-Bakı hissəsində izolyasiya işləri aparılıb və istismara yararsız borular demontaj olunub.
Dübəndi-Böyük Şor kəmərində yeni quraşdırılan boruda aparılan hidravlik sınaq zamanı aşkar edilən yararsız borular dəyişdirilib. Bu kəmərdə boru xətti yenisi ilə əvəz edilib.
Dübəndi Neft Terminalında su ehtiyatlarından səmərəli istifadə etmək məqsədilə yeni su nasosları quraşdırılıb.
Siyəzən neftvurma stansiyasında isə yeni quraşdırılan 2 ədəd mərkəzdənqaçma nasosunun izolyasiyası üzrə işlər başa çatdırılaraq sınaqdan keçirilib.
