Azərbaycan, Bakı, 23 fevral /Trend, müxbir E.İsmayılov/
Apreldə "Amec-Tekfen-Azfen" (ATA) alyansı "Chirag oil project" ("Azəri-Çıraq-Günəşli" yataqları blokunda neft hasilatının artırılması) çərçivəsində platformalar üçün yuxarı tikililərin (topside) və qazma obyektlərinin inşası üzrə işləri başa çatdıracaq. Bu barədə çərşənbə axşamı neft-qaz bazrındakı mənbə bildirib.
Mənbənin sözlərinə görə, hazırda həm yuxarı tikililərin, həm də qazma obyektlərin ayrı-ayrı elementlərinin quraşdırılması həyata keçirilir.
"Martdan yuxarı tikililərin və qazma obyektlərinin elementlərinin quraşdırılmasına başlamaq planlaşdırılır və onlar apreldə tamamlanmalıdır", - mənbə deyib.
Mənbənin bir müddət əvvəl dediyinə görə, platformalar üçün yuxarı tikililərin (topside) və qazma obyektlərinin inşası üzrə işlər 2012-ci ilin ortalarınadək başa çatdırılacaq.
Tikinti prosesi iki mərhələdən ibarət olacaq. Birinci mərhələ vacib elementlərin istehsalı, ikincisi isə onların montajıdır. Zəruri elementlər mərhələli şəkildə hazırlanacaq, bundan sonra isə onların tədricən montajı həyata keçiriləcək.
ATA artıq "Azəri-Çıraq-Günəşli" yataqlar blokunun işlənməsi layihəsi çərçivəsində texniki platformalardan birinin yuxarı tikilisinin qurulması ilə məşğul olub.
"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.
"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.
"Chirag oil project" altı milyard dollar həcmində investisiyanı nəzərdə tutur.
AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.
Layihə çərçivəsində qabaqlayıcı qazma 2010-cu ilin birinci və 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilata 2013-cü ilin sonunda başlamaq planlaşdırılıb.
Layihənin reallaşdırılması çərçivəsində 300 milyon barel neft hasilatı planlaşdırılır.
"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).