...

2011-ci ildə "Chirag oil project" çərçivəsində qabaqlayıcı qazma işləri davam etdiriləcək

Energetika Materials 2 Mart 2011 12:20 (UTC +04:00)

Azərbaycan, Bakı, 2 mart /Trend, müxbir E.İsmayılov/

2011-ci ildə BP şirkəti "Chirag oil project" ("Azəri-Çıraq-Günəşli" yataqları blokunda neft hasilatının artırılması) çərçivəsində dörd quyunun qazılması və müvəqqəti dayandırılmasını (qabaqlayıcı qazma) planlaşdırır. Bu barədə BP şirkətinin çərşənbə günü ötən ilin yekunları üzrə yaydığı rəsmi hesabatında deyilir.

Hesabatda bildirilir ki, 2010-cu il ərzində və 2011-ci ilin yanvarında qabaqlayıcı qazma çərçivəsində üç quyu qazılıb və bağlanıb. Quyular "Dədə Qorqud" qazma qurğusu vasitəsilə qazılıb.

ВР şirkəti bu il "Chirag oil project" ("Azəri-Çıraq-Günəşli" yataqları blokunda neft hasilatının artırılması) çərçivəsində əvvəllər müəyyən edilmiş meydanda qabaqlayıcı qazma üzrə işlərin davam etdirilməsini planlaşdırır. İşlər "Dədə Qorqud" qazma qurğusu vasitəsilə həyata keçiriləcək.

Platforma 12 quyunun qazılması üçün nəzərdə tutulub.

Ötən ilin dekabrı - bu ilin yanvarında dənizdə işlərin görülməsi üzrə üç müqavilə imzalanıb. Bunlar "Caspian Shipyard Company" ilə STB-1 barjalarının gücünün artırılması," McDermott Caspian Contractors İnc." ilə boru kəmərlərinin quraşdırılması və dalğıc xidmətlərinin göstərilməsi və "Сaspian Pipeline Coating" şirkəti ilə sualtı boru kəmərlərinin çəkilməsi üçün xidmətlərin göstərilməsi üzrə müqavilələrdir.

"Chirag oil project" dənizin 170 metr dərinliyində qurulacaq yeni platformada "Qərbi Çırağ"ın tikintisini nəzərdə tutur.

"Chirag oil project" çərçivəsində tikinti işlərinin əksəriyyəti, o cümlədən əvvəlki layihələr üçün xaricdə tikilən platformanın buruq modulunun tikintisi Azərbaycanda həyata keçiriləcək.

"Chirag oil project" altı milyard dollar həcmində investisiyanı nəzərdə tutur.

AÇG-də neft hasilatının artırılması çərçivəsində tikiləcək yeni platformadan Azeri Light növlü neft hasilatının planlaşdırılan sutkalıq həcmi 183 min barel təşkil edəcək. Yeni platformadan səmt qazının gözlənilən sutkalıq həcmi 6,5 milyon kubmetri ötəcək.

Layihə çərçivəsində qabaqlayıcı qazma 2010-cu ilin birinci və 2012-ci ilin ikinci yarısını əhatə edəcək. Bu dövrdə qabaqlayıcı qazmanı "Dədə Qorqud" qurğusu aparacaq. Platformadan hasilata 2013-cü ilin sonunda başlamaq planlaşdırılıb.

Layihənin həyata keçirilməsi çərçivəsində 300 milyon barel neft hasilatı planlaşdırılır.

"Azəri-Çıraq-Günəşli" layihəsinin iştirakçıları aşağıdakılardır: BP (operator - 37,43 faiz iştirak payı), "ChevronTexaco" (11,27 faiz), ARDNŞ (10 faiz), INPEX (10,96 faiz), "Statoil" (8,56 faiz), "ExxonMobil" (8,006 faiz), TPAO (6,75 faiz), "Itochu" (4,3 faiz), "Delta Hess" (2,72 faiz).

Xəbər lenti

Xəbər lenti