Azərbaycan, Bakı, 29 mart /Trend, müxbir E.İsmayılov/
2010-cu ildə ARDNŞ-nin (Azərbaycan Respublikası Dövlət Neft Şirkəti) iştirak payına malik olduğu Türkiyənin "Petkim" iri neft-kimya kompleksinə daxil olan müəssisələrin istehsal etdikləri məhsulun həcmi 2009-cu ildəki 2,96 milyon tona qarşı 3,24 milyon ton təşkil edib. Bu barədə "Petkim"dən bildirilib.
Məlumata görə, 2010-cu ildə "Petkim"in tərkibinə daxil olan müəssisələrin iş gücü 99 faizə çatıb.
Ötən ilin yekunları üzrə, "Petkim"in xalis mənfəəti 2009-cu ildəki 114 milyon türk lirəsinə qarşı 130 milyon lirə təşkil edib. 2010-cu ildə neft-kimya məhsullarının ixracı 2009-cu ildəki 347 milyon türk lirəsinə qarşı 531 milyon lirə təşkil edib.
Ötən il satışın ümumi həcmi 2,91 milyard lirə təşkil edib ki, bu da inişilki göstəricidən 41 faiz çoxdur.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün elan edilən tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verəcək.
"Petkim Petrokimya Holdinq" plastik qablaşdırmalar, parçalar, PVC, yuyucu vasitələr istehsal edir və Türkiyədə bu məhsulların yeganə istehsalçısıdır. Şirkət məhsullarının ¼-ni ixrac edir.