Azərbaycan, Bakı, 5 iyul /Trend, müxbir A.Axundov/
Azərbaycanın Qobustan rayonunda alternativ enerjidən istifadə üzrə poliqon 2011-ci ildə fəaliyyət göstərməyə başlayacaq. Bu barədə çərşənbə axşamı Trend-ə Sənaye və Energetika Nazirliyi Aparatının rəhbəri Rasim Məmmədov deyib.
"Qobustan rayonunda hibrid poliqonun tikintisi aparılır. Orada külək enerjisinin istehsalı üzrə qurğular, günə batareyaları yerləşdiriləcək. Bundan başqa, bioloji qazdan da istifadə oluna bilər. Poliqon 2011-ci ildə işə başlayacaq", - Məmmədov bildirib.
Onun sözlərinə görə, poliqonda artıq külək qurğuları var.
"Hazırda alternativ enerjinin istehsalı üzrə qurğuların quraşdırılacağı ölkənin regionlarının adları məlumdur. Bu, əsasən kiçik elektrik stansiyalarının tikintisi üçün su resurslarının olduğu regionlardır", - Məmmədov əlavə edib.
Məmmədovun sözlərinə görə, hazırda nazirlik və Sloveniyanın "Korona" şirkəti arasında Şəki rayonunda Şinçay çayında kiçik su elektrik stansiyasının tikintisi üzrə işlər aparılır.
"Artıq bu məsələ ilə bağlı razılıq əldə olunub, indi layihənin TİƏ-nin hazırlığı gedir. Bundan sonra tikintinin başlanmasının dəqiq tarixi məlum olacaq. TİƏ artıq bu il hazır ola bilər və gələn il tikinti başlaya bilər", - Məmmədov vurğulayıb.
Onun sözlərinə görə, indi Azərbaycanda "Alternativ enerji növləri haqqında" qanun hazırlanır.
Bundan əvvəl Məmmədovun dediyinə görə, ölkədə alternativ enerji növlərinin inkişafı üçün Sənaye və Energetika Nazirliyi yanında Alternativ və Bərpa Olunan Enerji Mənbələri üzrə Dövlət Agentliyinə 25 milyon manat ayrılıb.
"Agentliyə 25 milyon manat ayrılıb. Bunun təxminən 18 milyon manatı artıq istifadə edilib. Gələcəkdə alternativ enerji mənbələrinin inkişafı üçün ayrılan vəsaitlərin həcmi artacaq", - Məmmədov bildirib.
Onun sözlərinə görə, 5 il ərzində alternativ enerjinin Azərbaycanda elektrik enerjisinin istehsalı həcmində payı 1,5-2 faiz təşkil edə bilər.
