Azərbaycan, Bakı, 20 iyul /Trend, müxbir E.İsmayılov/
ARDNŞ-nin Gürcüstandakı Qara dəniz neft terminalı vasitəsilə Türkiyəyə stabil propilen tədarükü "Azərikimya" İstehsalat Birliyinə Türkiyənin iri neft-kimya kompleksi "Petkim" ilə əməkdaşlığı genişləndirməyə imkan verəcək. Bu barədə Trend-ə İB rəhbəri Muxtar Babayev deyib.
İB ARDNŞ-nin tərkibinə daxildir. Bundan başqa, ARDNŞ "Petkim"də iştirak payına malikdir.
"Türkiyəyə stabil propilen tədarükü yolu ilə biz "Petkim" ilə əməkdaşlığımızı genişləndirə bilərik. Tədarükün coğrafiyası Kulevi ilə stabil tədarüklər başlayandan sonra genişlənə bilər", - Babayev bildirib.
Onun sözlərinə görə, hazırda ARDNŞ Kulevi neft terminalı vasitəsilə qazabənzər məhsulların daşınması layihəsini hazırlayır. Terminalda qazabənzər məhsulların daşınması üçün yeni qurğuların tikintisi üçün imkanlar var.
"Bu layihənin həyata keçirilməsi başa çatdıqdan sonra "Azərikimya" Kulevi ilə dünya bazarına lazımi sayda propileni tranzitlə ixrac etmək imkanı əldə edəcək", - mənbə qeyd edib.
Kulevi terminalı 2008-ci ilin mayında istismara verilib. Neft məhsullarının faktiki olaraq boşaldılmasına iyundan başlanıb. Terminalda yüklərin yüklənib-boşaldılmasının ümumi gücü ildə 10 milyon ton neft yüküdür. Bura üç milyon ton neft, üç milyon ton dizel yanacağı, dörd milyon ton mazut daxildir. Rezervuar parkının ümumi tutumu 320 min kubmetr təşkil edir və 380 min kubmetrədək artırılması mümkündür.
Neft əməliyyatları üçün terminalda neft məhsullarının 100 min tonadək yükgötürmə qabiliyyətinə malik tankerə doldurulması üçün iki yanalma körpüsünün tikintisi nəzərdə tutulub. Məhsuldarlıq saatda 1000-dən 8000 kubmetrədək neft doldurulması təşkil edir. Müəssisədə liman, dəmiryol stansiyası da var ki, burada eyni vaxtda yükün boşaldılmasını gözləyən 180 vaqon-sistern yerləşdirmək mümkündür. Dəmiryol estakadalarında eyni vaxtda 168 vaqon-sisternin boşaldılması mümkündür.
2008-ci ildə "SOCAR/Turcas Petrol/Injaz Projects" şirkətlər alyansı Türkiyənin "Petkim" neft-kimya holdinqində 51 faizlik səhm paketinin alınması üçün elan edilən tenderin qalibi olub. Buna görə alyansa 2,04 milyard dollar təklif edilib. Hazırda Türkiyə zəruri kimya məhsullarının 70-75 faizini idxal edir. "SOCAR/Turcas/Injaz"ın "Petkim"in inkişafına yatıracağı sərmayələr məhsul idxalını 30 faizədək azaltmağa imkan verəcək.
"Petkim Petrokimya Holdinq" plastik qablaşdırmalar, parçalar, PVC, yuyucu vasitələr istehsal edir və Türkiyədə bu məhsulların yeganə istehsalçısıdır. Şirkət məhsullarının ¼-ni ixrac edir.
