Azərbaycan, Bakı, 22 avqust /Trend, müxbir E.İsmayılov/
Yanvar-iyunda Azərbaycanın "Şahdəniz" qaz-kondensat yatağından 3,07 milyard kubmetr qaz və 0,8 milyon ton (6,5 milyon barel) kondensat hasil olunub. Bu barədə BP-nin ilin birinci yarısı üzrə rəsmi hesabatında deyilir.
İlin birinci yarısında yataqdan orta sutkalıq hasilat 17 milyon kubmetr qaz və 35,8 min barel kondensat təşkil edib.
2010-cu ildə "Şahdəniz" yatağından 6,9 milyard kubmetrə yaxın qaz və 1,9 min ton (14,7 milyon barel) kondensat hasil olunub.
Ötən il yataqdan orta sutkalıq hasilat 19 milyon kubmetr qaz və 40,2 min barel kondensat təşkil edib.
Bu il layihə çərçivəsində əməliyyat xərclərinin həcmi 169,9 milyon dollar, əsaslı xərclər isə 791,6 milyon dollar təşkil edib. Yanvar-iyunda layihə çərçivəsində əməliyyat xərcləri 86,8 milyon dollar, əsaslı xərclər 298,2 milyon dollar təşkil edib.
2006-cı ilin sonundan ("Şahdəniz"də hasilata başlanandan) cari ilin birinci yarısının sonunadək dünya bazarlarına 56,3 milyon barel (7,13 milyon ton) kondensat göndərilib.
"Şahdəniz" yatağının işlənməsinin birinci mərhələsi çərçivəsində hasilatın ən yüksək həddi 8,6-9 milyard kubmetr səviyyəsində proqnozlaşdırılır. Proqnozlara görə, yatağın işlənməsinin ikinci mərhələsi çərçivəsində qaz hasilatı həcmini ildə 25 milyard kubmetrədək çatdırmaq mümkün olacaq.
"Şahdəniz" yatağının ehtiyatları 1,2 trilyon kubmetr qaz həcmində qiymətləndirilir.
"Şahdəniz" yatağı üzrə müqavilə 1996-cı il iyunun 4-də imzalanıb. Müqavilə iştirakçıları bunlardır: BP (operator) - 25,5%, "Statoil" - 25,5%, NICO - 10%, "Total" - 10%, "LukAgip" - 10%, TPAO - 9%, ARDNŞ - 10%.
