Azərbaycan, Bakı, 20 sentyabr /Trend, müxbir E.İsmayılov/
2012-ci ildə ARDNŞ (Azərbaycan Respublikası Dövlət Neft Şirkəti) neft emalı zavodlarına builki 6,4 milyon tona qarşı 6,6 milyon ton neft vermək niyyətindədir. Bu barədə jurnalistlərə çərşənbə axşamı ARDNŞ-nin emal üzrə vitse-prezidenti David Məmmədov bildirib.
"Azərbaycan bazarında neft məhsullarına tələbin artması müşahidə olunur, gələn il emal həcmlərinin artması isə Bakı-Novorossiysk boru kəməri ilə neft nəqli həcmlərinin azalacağı ilə izah olunur", - Məmmədov deyib.
Onun sözlərinə görə, əgər bu il neft kəməri ilə iki milyon ton neftin nəqli planlaşdırılıbsa, gələn il bu həcm 1,7 milyon ton olacaq.
"Bu ilin proqnozlarına görə, neft məhsullarına tələbatın artması beş faiz təşkil etməlidir, lakin ilin birinci yarısında bu göstərici 6,8 faiz olub", - ARDNŞ-nin vitse-prezidenti qeyd edib.
O həmçinin bildirib ki, hazırda Azərbaycanın iki NEZ-də dərin emal 93 faiz təşkil edir, lakin şirkətin bu göstəricini artırmaq imkanı var. Bu, 2012-13-cü illər ərzində ölkədə qazlaşdırmanın səviyyəsinin artırılmasını nəzərdə tutan proqramın başa çatması ilə əlaqədardır. Bu proqramın həyata keçirilməsindən sonra ölkədə mazuta tələbat azalacaq ki, bu da NEZ-də dərin emalın artırılması üçün şərait yaradacaq.
Həmçinin Məmmədov bildirib ki, ARDNŞ Avro-3 ekoloji standartlarına uyğun olaraq benzin və dizel yanacağı istehsalına başlamaq müddəti ilə bağlı planlarını saxlayır.
ARDNŞ Avro-3 standartlı dizel yanacağının istehsalına 2012-ci ildə, benzin istehsalına isə 2013-cü ildə başlamağı planlaşdırır.
