Azərbaycan, Bakı, 11 oktyabr /Trend, müxbir E.İsmayılov/
Heydər Əliyev adına Bakı Neft Emalı Zavodunda katalitik krekinq qurğusu planlı təmirdən sonra işə salınıb. Bu barədə cümə axşamı Trend-ə ARDNŞ-dəki mənbə məlumat verib.
Qurğunun işə salınması ilə əlaqədar Azərbaycanda tələbatın daim artdığı benzinin ölkədə fəaliyyət göstərən yanacaqdoldurma stansiyalarına tədarükü əvvəlki rejimdə həyata keçiriləcək.
Bundan əvvəl ölkənin benzinə olan tələbatının təmin olunması üçün ehtiyatlar yaradılıb.
Katalitik krekinq qurğusu benzin istehsal edən əsas qurğudur. Onun payına bu yanacaq növünün istehsalının ən azı 65 faizi düşür.
ARDNŞ 2014-2015-ci illərdə BNEZ-dəki bir neçə əsas qurğunun yenidən qurulması və müasirləşdirilməsi üçün planlı işləri başa çatdırmağı planlaşdırır.
Xüsusilə, zavodda enerji istehlakının azaldılması üzrə əhəmiyyətli ehtiyatların olduğu neftin ilkin destilləsi qurğusunun müasirləşdirməsi və katalitik krekinq qurğusunun gücünün artırılması planlaşdırılır. Müasirləşdirmə və genişləndirmə işlərindən sonra qurğunun gücü ildə iki milyon tondan üç milyon tona qədər artırılacaq.
