Azərbaycan, Bakı, 4 iyun /Trend, müxbir E.Əliyev/
2016-cı ildə yeni üzən qazma qurğusundan qazma işlərinə başlanılacaq. Yeni qurğunun inşasına yaxın vaxtlarda Azərbaycanda başlanılacaq. Trend-in məlumatına görə, bu barədə çərşənbə axşamı jurnalistlərə Azərbaycan Respubliaksı Dövlət Neft Şirkətinin (ARDNŞ) prezidenti Rövnəq Abdullayev deyib.
Onun sözlərinə görə, ilk müasir qazma qurğusunun tikintisinə yaxın vaxtlarda başlanılacaq, 2016-cı ilin ikinci yarısında başa çatacaq, bundan sonra qurğu suya buraxılacaq və işə başlayacaq.
İkinci qurğuya gəlincə, Abdullayev qeyd edib ki, iki qazma qurğusunun tikintisini praktiki olaraq paralel aparmaq planlaşdırılır. İkinci qazma qurğusu birincinin istismara verilməsindən bir neçə ay sonra qazma işlərinə başlaya bilər.
İlk qurğu ARDNŞ-nin ehtiyaclarını təmin etmək, ilk növbədə, "Ümid" və "Babək" perspektiv strukturlarında qazma işləri üçün cəlb ediləcək.
